Лукашэнка спалохаўся «паліттэхналогій» сваіх апанентаў

Беларускі дыктатар запатрабаваў ад навукоўцаў выпрацоўкі «эфектыўных метадаў супрацьстаяння паліттэхналогіям апанентаў».

«Гуманітарыі ніяк не вырашаць задачу сур'ёзнага навуковага суправаджэння ідэалогіі і працы з насельніцтвам. Нашыя апаненты, перш за ўсё на Захадзе, выкарыстоўваюць усе больш удасканаленыя паліттэхналогіі, а навукоўцы не ў стане прапанаваць эфектыўныя метады супрацьстаяння ім. Ці мы пакуль не ведаем пра такія метады?» - заявіў А.Лукашэнка на цырымоніі ўручэння дыпломаў доктара навук і атэстатаў прафесара навуковым і навукова-педагагічным працаўнікам, перадае «Інтэрфакс-Захад».

У прыватнасці, сказаў дыктатар, «у навуковым асяроддзі не спыняюцца спробы аддаць забыццю славянскія карані беларускага народа, растварыць нашае мінулае ў гісторыі Польшчы або Літвы». Тым не менш, А.Лукашэнка прызнаў, што і ў гуманітарыяў ёсць пэўныя дасягненні. У якасці прыкладу ён назваў доктарскую дысертацыю загадчыка кафедры Брэсцкага дзяржуніверсітэта ім. А.Пушкіна Аляксандра Вабішчэвіча «Аб барацьбе беларусаў за захаванне культурнай самабытнасці пад уладай Польшчы ў 1920-1930 гг.». Таксама А.Лукашэнка высока ацаніў працу дацэнта Белдзяржуніверсітэта Алены Сурковай «пра старажытнаславянскія асновы мовы нашых продкаў». «Аднак галасы такіх навукоўцаў слаба чутныя ў нашай прэсе, ды і ў грамадстве ў цэлым. Гэта ўжо недапрацоўка нашая», - заявіў кіраўнік.

Акрамя таго, А.Лукашэнка канстатаваў, што «нашыя эканамісты, сацыёлагі, палітолагі не змаглі пакуль даць належную адзнаку таму ўнікальнаму феномену, які ўяўляе сабой сучаснае беларускае грамадства».