Разгляд справы Палудня адклалі да студзеня

Разгляд справы былога намесніка міністра ўнутраных спраў - начальніка міліцыі грамадскай бяспекі Яўгена Палудня суд можа пачаць у пачатку студзеня 2013 года.

Пра гэта БелаПАН паведамілі ў Вярхоўным судзе.

Дакладная дата пачатку судовага разбору пакуль не вызначаная. Справа будзе слухацца ў Беларускім ваенным судзе. Цяпер матэрыялы вывучаюцца ў Ваеннай калегіі Вярхоўнага суда.

Нагадаем, Яўген Палудзень абвінавачваецца ў злоўжыванні ўладай, перавышэнні ўлады і атрыманні хабару. Дзеянні былога намесніка кіраўніка МУС кваліфікаваныя па ч. 3 арт. 424 КК (злоўжыванне ўладай або службовымі паўнамоцтвамі), чч. 2 і 3 арт. 426 КК (перавышэнне ўлады або службовых паўнамоцтваў асобай, якая займае адказнае становішча) і ч. 3 арт. 430 КК (атрыманне хабару).

Палудзень быў затрыманы 8 снежня 2011 года. Праз тыдзень яму прад'явілі абвінавачванне па ч. 3 арт. 424 КК (злоўжыванне ўладай ці службовымі паўнамоцтвамі). У лютым 2012 года ў дачыненні да Палудня была заведзеная другая крымінальная справа - па прыкметах злачынства, прадугледжанага ч. 3 арт. 426 КК (перавышэнне ўлады або службовых паўнамоцтваў асобай, якая займае адказнае становішча). Абедзве справы аб'ядналі ў адну вытворчасць. Следства ўстанавіла, што Палудзень сістэматычна на працягу доўгага перыяду часу атрымліваў ад службовых асоб органаў унутраных спраў матэрыяльныя каштоўнасці і грашовыя сродкі.

На сустрэчы з журналістамі 27 красавіка начальнік Следчага камітэта Валерый Вакульчык паведаміў, што гэтая справа - шматэпізодная, па ёй праходзіць шмат сведак. «Абгрунтаванасць затрымання Палудня не выклікае сумненняў», - сказаў кіраўнік СК.