За разгалашэнне праблем у медыцыне ўрачу пагражаюць турмой

У Віцебску ўрачам забараняюць гаварыць аб праблемах у шпіталях.

Калі ўрач з Віцебска Ігар Пастноў распавёў «Белсату» аб праблемах мясцовай медыцыны, улады адрэагавалі амаль імгненна.

Праўда, сваю энергію яны накіравалі не на рашэнне праблем, а на тое, каб прымусіць доктара маўчаць.

«Не размаўляйце з «Белсатам»

«Да загадчыцы паліклінікі прыйшлі двое ў цывільным, доўга пра мяне распытвалі, пагражалі, што мяне пасадзяць, і загадалі, каб я перастаў даваць інтэрв'ю «Белсату», маўляў, вы ўзбударажваеце грамадскае меркаванне», - кажа Ігар Пастноў і дадае: з самім урачом «людзі ў цывільным» размаўляць не сталі.

«Я хацеў бы растлумачыць гэтым людзям у цывільным, чаму я звярнуўся да «Белсата»: у нас пра элементарную праблему, якая ляжыць на паверхні, немагчыма гаварыць па нашым дзяржаўным тэлебачанні», - падкрэслівае доктар.

Што «баліць» віцебскай медыцыне?

Віцебскім аблвыканкамам цяпер кіруе прафесар медыцыны, заслужаны дзеяч навукі Аляксандр Касінец. Аднак у галіне аховы здароўя сітуацыя па-ранейшаму пакідае жадаць лепшага.

Паводле слоў Ігара Пастнова, адна з «болевых кропак» у службе аховы здароўя Віцебска - высокі ўзровень анкалагічных захворванняў. І пры гэтым спынена будаўніцтва другога корпуса анкалагічнага дыспансера. «Калі былі «выбары», туды паставілі кран, маўляў, яны пачынаюць нешта рабіць, а зараз яго ўжо ўбралі. А хірургічныя хворыя пасля цяжкіх аперацый ляжаць у калідорах, так як не хапае месцаў», - кажа ўрач.

Інфекцыйны шпіталь, пабудаваны 60 гадоў таму, Ігар Пастноў называе «далінай смерці». У 2010 годзе там пачалі рамонт аднаго з карпусоў. «І да гэтага часу там практычна нічога не зроблена. А ў першым корпусе хворыя цяпер ляжаць у нечалавечых умовах», - падкрэслівае доктар.

У пачатку года ў сетціве з'явілася шакавальнае відэа таго, у якіх умовах трымаюць самых маленькіх пацыентаў шпіталя. На ім бачна, што памяшканні патрабуюць капітальнага рамонту. У шпіталі паведамілі, што рамонт яшчэ не скончаны. Расказаць, на якой стадыі працы і наогул ці яны пачаліся, галоўны ўрач шпіталя адмовілася.