Пазычыў грошай? Арышт

У Гомелі пераапранутыя ў цывільнае супрацоўнікі аддзелу барацьбы з эканамічнымі злачынствамі затрымалі грамадскага актывіста Васіля Такарэнку.

«На ганку гасцініцы «Гомель» мой добры знаёмы пазычыў мне ўчора 250 тысяч рублёў. Я не паспеў яшчэ пакласці грошы ў кішэню, як падскочылі двое ў цывільным і забралі мяне ў апорны пункт міліцыі, а затым адвезлі ў 2-е аддзяленне на вуліцу Фадзеева. Пазычаныя грошы ў мяне забралі. Добра, што яшчэ пакінулі 1000 на праезд, а то і дадому не было б за што дабрацца», - распавёў Такарэнка «Радыё Свабода».

На Такарэнку склалі адміністрацыйны пратакол за парушэнне правілаў правядзення валютных аперацый. Прычым склалі на беларускай мове, як і патрабаваў затрыманы.

Васілю Такарэнку пагражае штраф да дзесяці з паловай мільёнаў рублёў ці адміністрацыйны арышт.