АБСЕ: Расследаванне спраў Завадскага і Бябеніна ў інтарэсах уладаў
4- 16.09.2010, 17:37
Прычынай забойстваў і знікненняў, на думку прадстаўнікоў АБСЕ, з'яўляецца прафесійная дзейнасць.
Прадстаўнікі міжнароднай журналісцкай супольнасці патрабуюць ад беларускіх уладаў аб'ектыўнага расследавання смерці журналіста Алега Бябеніна і знікнення аператара Дзмітрыя Завадскага, перадае БелаПАН.
Гэтыя патрабаванні прагучалі 16 верасня ў Кіеве на міжнароднай канферэнцыі «10 гадоў забойства Георгія Гангадзэ не раскрытае: пошук новых шляхоў барацьбы з беспакаранасцю».
Ва ўступным слове прадстаўнік арганізацыі «Артыкль 19» (Вялікабрытанія) Наталі Лоскут заявіла, што сённяшняя канферэнцыя прысвечана і іншым журналістам, забітым на сваёй працы. Такія выпадкі працягваюцца, падкрэсліла яна, прывёўшы ў якасці прыкладу нядаўнюю смерць журналіста Алега Бябеніна. «Мы лічым, што яго гібель звязаная з прафесійнай дзейнасцю», - дадала Лоскут.
Паводле яе словаў, не разглядалася адпаведным чынам і знікненне 10-гадовай даўніны Дзмітрыя Завадскага. «Практыка паказвае, што такія справы застаюцца без расследавання», - сказала Наталі Лоскут.
Прадстаўнік офіса ўпаўнаважанага АБСЕ па пытаннях свабоды мас-мэдыяў Роланд Блес заявіў, што «беларускія ўлады павінны кампетэнтна і празрыста расследаваць смерць Бябеніна, паколькі гэта не толькі ў інтарэсах журналістаў, але і ў інтарэсах саміх уладаў».
«Органы дзяржаўнай улады ўсюды ўвязваюць гібель журналістаў не з іх прафесійнай дзейнасцю, а з якімі-небудзь крымінальнымі матывамі. Аднак у большасці выпадкаў прычынай забойстваў, на нашу думку, усё ж такі з'яўляецца прафесійная дзейнасць», - падкрэсліў Блес.
Прадстаўнік арганізацыі «Міжнародная падтрымка медыя» Джэйн Мелер Ларсен, у сваю чаргу, адзначыла: больш за ўсё турбуе тое, што за забойства журналістаў вінаватых не прыцягваюць да адказнасці. Таму журналісты самі павінны абмеркаваць эфектыўныя спосабы сваёй абароны, лічыць яна.
