ПАРЭ выступае за «замарозку» кантактаў з Беларуссю на высокім узроўні

Пра гэта гаворыцца ў праекце рэзалюцыі, якая будзе прынятая па сітуацыі ў Беларусі.

Дакладчык камітэта па палітычных пытаннях Парламенцкай асамблеі Савета Еўропы Сініка Хурскайнэн прадставіла праект рэзалюцыі па Беларусі, дзе заклікала Савет Еўропы прыпыніць кантакты на высокім узроўні, але працягнуць дыялог з уладамі і грамадзянскай супольнасцю.

Выступаючы 29 красавіка на пазачарговых дэбатах па сітуацыі ў Беларусі, Хурскайнэн адзначыла, што працэс збліжэння, які пачаўся некалькі гадоў таму, «зноў спыніўся па многіх прычынах». Яна звярнула ўвагу на новыя выпадкі прымянення смяротнага пакарання, ціск на незалежныя СМІ, грамадзянскую супольнасць, апазіцыйныя структуры, а таксама арганізацыі польскай нацыянальнай меншасці.

Па словах фінскага дэпутата, гэта з'яўляецца рухам у адваротным кірунку ад агульнай мэты - збліжэння Савета Еўропы і Беларусі.

Пры гэтым Хурскайнэн выказалася за працяг дыялогу з беларускімі ўладамі, заявіўшы аб немагчымасці вяртання да палітыкі ізаляцыі. «Мы чакаем ад Беларусі выразны палітычны сігнал з самага высокага ўзроўню, што краіна гатовая супрацоўнічаць з намі (па пытаннях павагі стандартаў Савета Еўропы. - БелаПАН.) І дасягаць адчувальных вынікаў», - сказала дэпутат.

Дакладчык камітэту ПАРЭ па юрыдычных пытаннях і правах чалавека Хрыстас Пургурыдрас падтрымаў праект рэзалюцыі па Беларусі. «Без выразнага сігналу ад беларускага кіраўніцтва пра гатовасць ісці насустрач мы не павінны наведваць гэтую краіну», - сказаў ён.

Нідэрландскі дэпутат Пітэр Омтзіхт ў сваім выступе нагадаў, што папярэдняй умовай ПАРЭ для вяртання Беларусі статусу спецыяльна запрошанага было ўвядзенне мараторыя на смяротнае пакаранне, аднак беларускія ўлады працягваюць практыку прымянення вышэйшай меры пакарання.

Расейскі дэпутат Сяргей Маркаў таксама падтрымаў падрыхтаваную рэзалюцыю. Ён выказаў занепакоенасць сітуацыяй з польскай меншасцю ў Беларусі, невысокай канкурэнцыяй на мясцовых выбарах, перашкодамі для распаўсюджвання расеійскіх тэлеканалаў.

Асудзіўшы ўжыванне смяротнага пакарання ў Беларусі, Маркаў прапанаваў весці з ЗША больш жорсткі дыялог па гэтым пытанні.

У другой палове дня пройдзе галасаванне па прадстаўленай рэзалюцыі.