Нацбанк не стрымаў дадзенае МВФ абяцанне

Нацыянальны банк Беларусі павялічыў колькасць падшэфных сельгаспрадпрыемстваў з 11 да 14, парушыўшы тым самым абяцанне, дадзенае Міжнароднаму валютнаму фонду.

Як паведамляе АФН, Нацбанк узяў пад сваё крыло «ААТ «Парахонск», ААТ «Пачапава» (Пінскі раён) і ААТ «Ружаны-Агра» (Пружанскі раён).

Адпаведная пастанова Савета Міністраў № 325, прынятая 6 сакавіка 2010 года, ідзе ў поўны разрэз з абавязальніцтвамі беларускіх уладаў перад МВФ у рамках праграмы stand-by.

У прыватнасці, Беларусь абавязалася, што ў 2010 годзе Нацбанк не толькі спыніць выдачу новых крэдытаў і ўдзел у капітале новых няпрофільных актываў, большасць якіх прыпадае на сельгаспрадпрыемствы, але выставіць на продаж каля паловы падшэфных арганізацый.

Практыка аказання дапамогі сельгаспрадпрыемствам праз замацаванне іх за тым ці іншым дзяржорганам упраўлення была зацверджана яшчэ ў пачатку 2004 года пастановай Савета Міністраў № 213 і прадугледжвае аказанне фінансавай дапамогі падшэфным арганізацыям.

Згодна з гэтым дакументам, кіраўнікі органаў дзяржупраўлення абавязаныя ажыццяўляць «комплекс мерапрыемстваў па аказанні замацаваным за імі сельскагаспадарчым арганізацыям дапамогі ва ўмацаванні іх матэрыяльна-тэхнічнай базы, укамплектаванні кваліфікаванымі кадрамі і наладжванні высокаэфектыўнага сельскагаспадарчай вытворчасці з выкарыстаннем прагрэсіўных формаў арганізацыі працы і кіравання».

Калі формы арганізацыі працы і кіравання ў падшэфных гаспадарках яшчэ можна памяняць толькі за кошт досведу і ведаў супрацоўнікаў Нацбанка, то ўмацаванне матэрыяльна-тэхнічнай базы без улівання грошай або за кошт прамой закупкі Нацбанкам абсталявання і тэхнікі ажыццявіць немагчыма.

Варта адзначыць, што ў канцы сакавіка савет дырэктараў МВФ будзе прымаць рашэнне аб выдзяленні апошняга траншу крэдыту па праграме stand-by. Аднак у Нацбанку не сталі каментаваць, як пашырэнне сельгасугоддзяў рэгулятара можа паўплываць на рашэнне Савета дырэктараў МВФ.

Між тым, абавязак па даглядзе за сельгаспрадпрыемствамі, падобна, зусім не напружвае кіраўніцтва Нацбанка. Яшчэ ў студзені яго кіраўнік Пётр Пракаповіч, распавядаючы пра планы пазбаўлення ад сельгасугоддзяў у мэтах выканання абавязацельства перад МВФ, паабяцаў звазіць журналістаў, калі пацяплее, у адзну з такіх гаспадарак. Паводле яго слоў, такім чынам прадстаўнікі прэсы змогуць на свае вочы пераканацца, наколькі спрыяльнае ўздзеянне на дадзеныя гаспадаркі аказвае фінансавая падтрымка з боку Нацбанка.

Але нават калі прэса будзе ўражаная чысцінёй і парадкам на малочных фермах, гэта ніколькі не вызваляе ўлады ад выканання абавязацельства, пад якім стаяць подпісы Пракаповіча і прэм'ера Сяргея Сідорскага.