Царкву «Новае жыццё» аштрафавалі на 100 тысячаў даляраў

Суддзя Маскоўскага раёна Менска Алена Шылько вынесла прысуд пратэстанцкай царкве «Новае жыццё» па пазове камітэта аховы прыроды Менгарвыканкама.

Царква павінна кампенсаваць нібыта нанесеную ёю шкоду навакольнаму асяроддзю ў памеры 263 мільёны рублёў (амаль 100 тысячаў даляраў), а таксама заплаціць за гэта штраф 8 мільёнаў 750 тысячаў рублёў, паведамляе «Радыё Свабода».

Пра гэта паведаміў юрыст царквы «Новае жыццё» Сяргей Луканін.

Сяргей Луканін адзначае, што камітэт аховы прыроды Менгарвыканкама без ведама царквы і без сведак узяў пробы грунта на прылеглай да яе будынка тэрыторыі. Аналіз паказаў падвышанае ўтрыманне нафтапрадуктаў. Довады Луканіна, што да набыцця царквой будынка былога кароўніка побач знаходзілася несанкцыянаваная гарадская звалка, у тым ліку старых аўтамабіляў, суддзя таксама не прыняла да ўвагі.

Царква «Новае жыццё» збіраецца абскардзіць рашэнне суда ў адпаведных інстанцыях.