У ФХБ не каментуюць пройгрыш хакеістаў – чакаюць справаздачы Захарава

У Федэрацыі хакея Беларусі пакуль не каментуюць выступ зборнай на алімпійскім турніры ў Ванкуверы.

Як заявіў БелаПАН выканаўца абавязкаў старшыні ФХРБ Уладзімір Швабоўскі, рабіць высновы, засноўваючыся толькі на тэлевізійнай «карцінцы», будзе не зусім аб'ектыўна.

Паводле яго словаў, ФХРБ плануе заслухаць справаздачу галоўнага трэнера зборнай Міхаіла Захарава. Гэта можа адбыцца на справаздачна-выбарчай канферэнцыі федэрацыі, прызначанай на 15 сакавіка.

Чакаецца, што беларускія хакеісты вернуцца з Ванкувера 26 лютага.

На алімпійскім турніры зборная Беларусі не змагла выйсці ў чвэрцьфінал, прайграўшы ў стыкавым матчы камандзе Швейцарыі — 2:3 (1:1, 1:1, 0:0, 0:0, буліты — 1:2).

Да гэтага зборная Беларусі выйграла ў каманды Германіі з лікам 5:3, прайграла фінам (1:5) і шведам (2:4).