Праезд па Беларусі для замежнікаў павінен падаражэць

Лукашэнка ўстанавіў стаўкі збору за праезд транспартных сродкаў замежных дзяржаў па беларускіх дарогах агульнага карыстання.

Расейскім грамадзянам можна будзе не плаціць, калі яны не кіруюцца праз Беларусь транзітам у трэція краіны. Гэтае рашэнне замацавана ўказам Лукашэнкі № 550 ад 27 кастрычніка, паведамляе ПРАЙМ-ТАСС.

У адпаведнасці з дакументам, для грузавых аўтамабіляў/ цягачоў з прычэпамі/ паўпрычэпамі/ або без іх грузападымальнасцю да 10 т уключна ўстанаўліваецца стаўка збору ў памеры 20 еўра, ад 10 да 24 т уключна - 25 еўра, звыш 24 тон - 35 еўра. Для аўтобусаў указам устаноўлена стаўка ў памеры 15 еўра - аўтобусы змяшчальнасцю да 12 месцаў ўключна, 25 еўра - ад 13 да 30 месцаў ўключна і 30 еўра - звыш 30 месцаў.

Вылічэнне сумы збору за праезд будзе праводзіцца ў беларускіх рублях па афіцыйным курсе Нацбанка па адносінах да еўра, устаноўленым на дату яго выплаты.

Пры гэтым ад выплаты збору вызваляюцца працоўныя дыпламатычных і консульскіх установаў Беларусі, а таксама ўладальнікі легкавых аўтамабіляў, зарэгістраваных у дзяржавах-сябрах Мытнага саюза, якія ўязджаюць на тэрыторыю Беларусі з тэрыторыі РФ з наступным выездам у дзяржавы-сябры Мытнага саюза без заезду ў трэція краіны.