Прыватныя крамы пяройдуць на айчынны асартымент

КДК узмоцніць жорсткасць кантролю за выкананнем аблвыканкамамі «прагнозных паказчыкаў».

Пра гэта заявіў 28 студзеня старшыня камітэта Зянон Ломаць на паседжанні Магілёўскага аблвыканкама, дзе разгледжаныя вынікі працы народна-гаспадарчага комплексу рэгіёна за 2009 год, перадае БелТА.

«Кантроль за выкананнем прагнозных параметраў будзе весціся штотыдзень, і для гэтага распрацаваная спецыяльная методыка. Ацэнкі па выніках кожнага месяца будуць давацца самыя жорсткія. Таму, пачынаючы з сённяшняга дня, чыноўнікі і кіраўнікі прадпрыемстваў павінны настройваць сябе на актыўную працу ў гэтым накірунку. Пры гэтым мы не павінны забываць, што галоўным крытэрам павінна стаць забеспячэнне фінансавай устойлівасці: рэнтабельнасць, прыбытак, наяўнасць абаротных сродкаў на рахунку прадпрыемстваў», - адзначыў Зянон Ломаць.

Кіраўнік Камітэта дзяржкантролю звярнуў асаблівую ўвагу на актывізацыю працы па зніжэнні складскіх запасаў, павелічэнні экспарту, мінімізацыі імпарту і на максімальна магчымае пасоўванне беларускіх тавараў на новыя рынкі. «Мы павінны больш актыўна прыцягваць да гэтай працы прыватны бізнэс, асабліва тыя суб'екты, якія займаюцца аптовым і рознічным гандлем. Недапушчальна, каб на прылаўках прыватных крамаў не было тавараў айчыннай вытворчасці», - лічыць Зянон Ломаць.

Кіраўнік кантрольнага ведамства таксама заклікаў да рацыянальнага і эфектыўнага выкарыстання бюджэтных сродкаў і дзяржмаёмасці, якая маецца ў наяўнасці. «Ацэнка будзе самая жорсткая, не зважаючы на асобы і пасады», - канстатаваў Зянон Ломаць.