У Менску ўшанавалі памяць паўстанцаў 1863 года (Фота)
7- 22.01.2010, 12:30
22 студзеня актывісты апазіцыі адзначылі ўгодкі пачатку паўстання пад кіраўніцтвам Кастуся Каліноўскага.
У некалькіх раёнах Менска (на вуліцах Свярдлова, Магілёўскай, Нямізе, праспекце Дзяржынскага) на заснежаных схілах актывісты «Маладых хрысціянскіх дэмакратаў» і «Моладзі БНФ» зрабілі надпісы чырвонай фарбай: «1863 - АДВАГА», «1863 - ГОНАР», «1863 - ВОЛЯ», «1863 - ЖЫВЕ БЕЛАРУСЬ!»
Як паведамляе «Радыё Свабода», мэта акцыі - прыцягнуць увагу мінакоў да каштоўнасцяў, за якія змагаліся нашыя знакамітыя продкі, і сцвердзіць пераемнасць змагання за свабоду і незалежнасць Беларусі.
Нагадаем, што Кастусь Каліноўскі — кіраўнік нацыянальна-вызвольнага паўстання ў Беларусі супраць царызму ў 1863-1864 гадах. Ён са сваімі аднадумцамі імкнуўся прыцягнуць сялянаў да барацьбы за волю, зямлю і народаўладдзе, заклікаў таксама да стварэння самастойнага беларускага ўрада, незалежнага ад Расеі і Польшчы. Падчас паўстання на тэрыторыі Беларусі адбылося 56 баёў і баявых сутычак з царскімі войскамі, але ўжо да верасня 1863 года паўстанне было задушанае. 128 чалавек, у тым ліку Каліноўскі, былі пакараныя смерцю. Выступы супраць царызму мелі месца яшчэ і ў 1864 годзе.
