«Падарунак» мужчынам: З 23 лютага ў Беларусі забароняць піць піва на вуліцы

Распіваць піва ў грамадскіх месцах будзе забаронена роўна праз месяц.

Гэта прадугледжана законам «Аб ўнясенні зменаў і дадаткаў у некаторыя кодэксы Рэспублікі Беларусь па пытаннях крымінальнай і адміністрацыйнай адказнасці», які афіцыйна апублікаваны 22 студзеня ў выданні Нацыянальнага рэестру прававых актаў Беларусі і ўступіць у сілу праз месяц, паведамляе БелТА.

У прыватнасці, законам вызначаецца адміністрацыйная адказнасць за распіццё слабаалкагольных напояў і піва на вуліцах, стадыёнах, скверах, парках, у грамадскім транспарце і іншых грамадскіх месцах, акрамя тых, якія прызначаныя для іх ужывання.

У законе таксама даюцца паняцці піва і слабаалкагольных напояў. У прыватнасці, піва - гэта напой, які атрымліваецца шляхам зброджвання ахмеленага соладавага сусла піўнымі дрожджамі з аб'ёмнай доляй этылавага спірту 0,5% і больш. Здавалася б, такое вызначэнне цалкам дазваляе распіваць у грамадскіх месцах так званае безалкагольнае піва. Аднак на бутэлькавых этыкетках гэтага напоя, якое можна набыць у Беларусі, напісана, што ўтрыманне алкаголю ў ім не больш 0,5% аб'ёму. У сувязі з гэтым праваахоўнікі, вядома, абяцаюць больш ліберальны падыход да аматараў безалкагольнага піва, аднак прызнаюць, што гэтае пытанне даволі далікатнае і вырашыць яго можа толькі праваўжывальная практыка.

Да слабаалкагольных адносяцца напоі (за выключэннем кісламалочных, квасу і піва) з аб'ёмнай доляй этылавага спірту ад 0,5% да 7%.

Новым законам вызначаецца таксама адказнасць за выраб фізічнымі асобамі моцных алкагольных напояў, іх набыццё (за выключэннем тых, продаж якіх дазволены), набыццё самагона, паўфабрыкатаў для яго вырабу, брагі, захоўванне самагонных апаратаў, а таксама больш чым 5 л самагона ці 30 л брагі. Пад моцнымі алкагольнымі напоямі і самагонам разумеюцца алкагольныя напоі з аб'ёмнай доляй этылавага спірту 28% і больш. Таму ў аматараў хатняга віна і рознага кшталту настоек для непакою, здаецца, няма прычынаў.

Нагадаем, штрафныя санкцыі будуць такія ж, як і за распіццё ў грамадскіх месцах спіртных напояў. На першы раз прыйдзецца раскашэліцца на суму да 8 базавых велічыняў (у цяперашні час адна базавая велічыня складае Br35 тыс.). Паводле новага закона, у тым выпадку, калі чалавек паўторна на працягу года прыцягваецца да адміністрацыйнай адказнасці за распіццё піва ці слабаалкагольных напояў у непрызначаных месцах ці за знаходжанне на працоўным месцы ў нецвярозым стане, ён можа быць аштрафаваны на суму ад 2 да 15 базавых велічыняў (каля $190), альбо да яго будзе ўжыты адміністрацыйны арышт.