Пратэстанты «Новага жыцця» сустрэліся з амбасадарамі краінаў Еўразвяза
2- 26.08.2009, 9:06
25 жніўня пастар царквы «Новае жыццё» Вячаслаў Ганчарэнка разам з юрыстам Сяргеем Луканіным наведаў амбасаду Францыі ў Менску.
У французскай амбасадзе адбылася сустрэча з амбасадарамі краінаў Еўразвяза.
На сустрэчы прысутнічалі амбасадары Баўгарыі, Вугоршчыны, Нямеччыны, Ірландыі, Італіі, Латвіі, Літвы, Нідэрландаў, Польшчы, Румыніі, Славакіі, Францыі, Чэхіі, Швецыі, Эстоніі, а таксама прадстаўнік Еўракамісіі ў Рэспубліцы Беларусь, паведамляе www.newlife.by.
Вячаславу Ганчарэнку былі зададзеныя пытанні адносна канфлікту з гарадскімі ўладамі. Дыпламаты ўдакладнялі, ці сапраўды супольнасці паступалі такія прапановы з боку ўладаў адносна вылучэння супольнасці новага зямельнага ўчастку ці новага будынка, як было агучана ў рэпартажах Першага канала нацыянальнага тэлебачання.
Пастар выклаў сваю пазіцыю і патлумачыў, што ўсе прапановы ўладаў - гэта, па-першае, нераўнацэнны абмен, па-другое, ён нічым не падмацаваны, таму ў вернікаў «Новага Жыцця» няма ніякага даверу да падобных абяцанняў.
«Канструктыўны дыялог з уладамі магчымы ў тым выпадку, калі нашай царкве будзе вернутае ўсё, што ў яе незаконна аднятае», - падкрэсліў падчас сустрэчы В.Ганчарэнка.
Нагадаем, што грамадзянская справа паміж царквой і сталічнымі ўладамі па пытанні зносу будынка, дзе збіраюцца вернікі, вялася з 2005 года. Сёлета Вышэйшы гаспадарчы суд пацвердзіў законнасць рашэння гарвыканкама, за будынак царква павінна была атрымаць 37,5 млн рублёў. Днямі вернікі ў чарговы раз адмовіліся перадаць будынак.
