Расея абвінаваціла Беларусь у зрыве дамоўленасцяў па малаку

Зрыў дамоўленасцей можа прывесці да новага прыпынення ўвозу беларускага малака.

Па словах галоўнага санітарнага ўрача РФ Генадзя Анішчанкі, расейскі бок дапусціў на рынак больш за 400 відаў малочнай прадукцыі з Беларусі, аднак з 17 чэрвеня з боку беларускіх вытворцаў паступіла «смяхотна малая» колькасць узораў для экспертызы - каля 30. «Гэтая сітуацыя пачынае ацэньвацца намі як планамерная праца з боку Беларусі па зрыве дасягнутых дамоўленасцяў», - дадаў кіраўнік Расспажыўнагляда.

Нагадаем, у пачатку чэрвеня бягучага года Расспажыўнагляд забараніў увоз каля 500 найменняў малочных прадуктаў з Беларусі. Забарона тлумачылася неабходнасцю перааформіць дакументы на імпарт тавараў у сувязі з новым тэхнічным рэгламентам па малаку, прынятым у Расеі ў канцы 2008 года. У СМІ сітуацыю назвалі «малочнай вайной».

Пазней прэм'ер-міністр Расеі Уладзімір Пуцін патлумачыў, што «малочная вайна» пачалася з-за таго, што Менск перавышаў квоты па аб'ёме экспарту малака ў Расею на 40 адсоткаў. Акрамя таго, забарону на ўвоз беларускіх прадуктаў звязвалі і з канфліктам вакол вылучэння Расеяй крэдыту Беларусі на два мільярды даляраў, пасля таго, як расейскі бок прыпыніў пералік апошняга транша пазыкі ў 500 мільёнаў.