Стаўка ПДВ можа падвысіцца да 22%

Беларускі ўрад прапрацоўвае розныя варыянты змянення стаўкі падатку на дададзеную вартасць, паведаміў журналістам у Гомелі прэм'ер-міністр Беларусі Сяргей Сідорскі.

«На колькі адсоткаў (павялічыць - ІФ) - мы пакуль пралічваем, магчыма, гэта будзе на 1-2-3%», - цытуе Сідорскага «Інтэрфакс».

Прэм'ер патлумачыў, што ў цяперашні час пытанне змянення стаўкі і яго ўплыву ў эканоміцы вывучаюць эксперты.

Кіраўнік урада заўважыў, што для падтрымкі экспарцёраў вельмі важнае скарачэнне абаротных падаткаў, якія абцяжарваюць эканоміку прадпрыемстваў. Ён нагадаў пра прыняты ў Беларусі курс на адмену ў 2010 годзе абаротных падаткаў. «Мы паступова зніжаем абаротныя падаткі ў краіне, засталася некаторая іх частка. Мы прапаноўваем фарсіравана прайсці гэты шлях», - паведаміў С.Сідорскі.

Разам з тым ён заўважыў, што неабходна ўлічваць не толькі інтэрасы прадпрыемстваў-экспарцёраў - нельга забываць і пра сферу паслугаў у краіне. «Бо тады (пры павелічэнні ПДВ - ІФ) паслугі ўнутры краіны будуць разлічвацца, не зыходзячы з 18%, а, дапусцім, 20-22%», - сказаў кіраўнік беларускага ўрада.

«Пралічыўшы ўсе варыянты, мы ў хуткім часе вызначымся і ўнясем прапанову прэзідэнту для прыняцця канчатковага рашэння», - адзначыў прэм'ер.