Фестываль Be2gether-2009: Лівень, цыганскія панкі і Belarus Freedom (Фота)

Міжнародны музычны фестываль Be2gether, нягледзячы на малады ўзрост, ужо зараз можна назваць Вудстокам Усходняй Еўропы.

Трэці год запар на яго з'язджаюцца беларусы, палякі, літоўцы, латышы. Па прызнанні арганізатараў, Be2gether-2009 стаў самым масавым. І калі раней у намётавым мястэчку ў асноўным гучалі галасы літоўцаў, сёлета беларуская мова ўзяла рэванш – Be2gether-2009 сабраў некалькі тысяч беларусаў.

Першы дзень фестываля (12 чэрвеня) быў азмрочаны ліўнем. Таму нядзіўна, што ў Вільнюсе і бліжэйшых гарадах самымі папулярнымі таварамі сталі гумовыя боты і дажджавікі.

Аднак, нягледзячы на надвор'е, пятніцкім вечарам танцпол каля галоўнай сцэны фестывалю быў больш чым ажыўлены. Хэдлайнеры першага дня Be2gether цыганскі панк-рок-гурт Gogol Bordello з ЗША давялі, што надвор'е робіць мастацтва. Запальныя песні ў выкананні экспрэсіўнага эмігранта з Кіева Яўгена Гудзя прымусілі змоклых гледачоў выдатна папацець. Падчас выступу Gogol Bordello на сцэну нечакана ўзляцеў бел-чырвона-белы сцяг. Перкусіяніст гурту павесіў яго сабе на шыю, чым выклікаў весялосць гледачоў.

У суботу на фестывалі ў Нарвілішках выступілі два беларускія груты The Toobes і «Ляпіс Трубяцкі» . Дарэчы, «Ляпісы» – адзіны гурт, які выступае на Be2gether у другі раз. Пасля выхаду ў свет альбома «Маніфест» арганізатары вырашылі запрасіць «Ляпісаў» паўторна. І, трэба сказаць, арганізатары Be2gether-2009 не прамахнуліся з выбарам. Выступленне беларускага гурта сабрало каля галоўнай сцэны не менш за тысячу чалавек. Над танцполам луналі бел-чырвона-белыя сцягі. А падчас песні Belarus Freedom фронтмэну гурта Сяргею Міхалку падпявалі сотні гледачоў.

Закрывалі фестываль ветэраны альтэрнатыўнай музыкі, швецкі гурт Clawfinger. Выступ хэдлайнераў стаў адным з самых яскравых і эмацыйных дзеяў Be2gether-2009. У той час як вакаліст Зак Тэл абліваў гледачоў вадой, гітарыст гурта скакаў з чатырохметровай вышыні ў натоўп і паказваў майстэрства «кідання» гітары ўпоперак сцэны.

Раніцай 14 чэрвеня наведвальнікі Be2gether складалі намёты і пакавалі змакрэлыя за некалькі дзён рэчы. Еўрапейскі фестываль скончыўся, аднак водгукі аб ім гучалі нават увечары на літоўска-беларускай мяжы. Доўгая чарга машын расцягнулася на некалькі кіламетраў. А з іх магнітол даносіліся песні «Ляпісаў».

Амбасадар Літвы ў Беларусі спадар Богданас прыехаў на фестываль з сябрамі

Фота «Еўрарадыё»