Адвакат Зэльцэра падае скаргу ў Вярхоўны суд і Генпракуратуру

Зміцер Гарачка мае намер даведацца, чаму Менскі гарадскі суд не выдае дакументы для ўжывання амністыі да ягонага падабароннага Эмануіла Зэльцэра.

«Я накіроўваю скаргі ў Вярхоўны суд і Генпракуратуру ў сувязі з тым, што Менскі гарадскі суд зацягвае з выдачай даведкі, неабходнай для разгляду пытання аб ужыванні да Эмануіла Зэльцэра амністыі», - паведаміў Зміцер Гарачка агенцтву «Інтэрфакс».

Ён заявіў, што «з-за таго, што Менскі гарадскі суд зацягвае з выдачай гэтай даведкі, Э.Зэльцэр абвясціў галадоўку».

Па словах З.Гарачкі, адміністрацыя калоніі, у якой адбывае пакаранне ягоны падабаронны, некалькі тыдняў таму зрабіла запыт у суд аб тым, што да Э.Зэльцэра няма пазоваў, каб пачаць разглядаць пытанне аб ужыванні амністыі.

«Я звярнуўся з просьбай у Менскі гарадскі суд аб тым, каб растлумачылі, чаму зацягваюцца тэрміны выдачы дадзенай даведкі. У судзе мне адказалі, што перапіска суду з выпраўленчай калоніяй не ўваходзіць у сферу інтэрасаў адваката», распавёў З.Гарачка. Ён таксама паведаміў, што ў мінулую сераду быў у свайго падабароннага ў калоніі. «Ён галадае, наладжаны працягваць галадаць. Лічыць, што толькі гэтым спосабам можа прыцягнуць увагу да праблемы - зацягвання з адказам з боку Менскага гарадскога суду на запыт выпраўленчай калоніі», - заявіў Зміцер Гарачка.

Эмануіл Зэльцэр і ягоная сакратар Уладлена Функ былі затрыманыя ў Менску 12 сакавіка 2008 года. 11 жніўня Менскі гарадскі суд прысудзіў Эмануіла Зэльцэра да трох год пазбаўлення волі за выкарыстанне загадзя ілжывых дакументаў і замах на камерцыйны шпіянаж. Ягоная сакратар - Уладлена Функ (Брускова) была прысуджаная да аднаго году пазбаўлення волі.

Усе судовыя працэсы па дадзенай справе праходзілі ў закрытым рэжыме.

ЗША патрабуюць неадкладнага вызвалення Эмануіла Зэльцэра на гуманітарных падставах, паколькі ў зняволенні стан ягонага здароўя сур'ёзна пагоршыўся.