Брэсцкі камбінат вярнуў доўг «Белгазпрамбанку» дыванамі
14- 11.06.2009, 14:38
Атрыманы доўг у выглядзе дываноў банк прадае праз прафкам панчошнага камбіната і на электралампавым заводзе.
Панчошны і электралампавы камбінаты Брэста ў сваю чаргу прапаноўваюць дываны сваім супрацоўнікам у якасці заробку. Таму што каштуюць гэтыя дываны ўдвая-утрая танней, чым у крамах, паведамляе «Еўрарадыё».
На прахадной Брэсцкага электралампавага завода працаўніца пацвердзіла: «Так, можна купіць у 2-3 разы танней, чым у краме. Людзі бяруць. Раней такога не было. Толькі нядаўна сталі прадаваць».
– А плаціць як?
–Можно адразу, а можна з растэрміноўкай на тры месяцы.
Па словах супрацоўнікаў, грошы за дываны потым вылічваюць з заробку.Вахцёры на прахадной электралампавага завода інфармацыю пацвердзілі.
Аднак на самім Дывановым заводзе ніхто з адміністрацыі не захацеў размаўляць на гэтую тэму. Пагутарыць пагадзіліся толькі супрацоўнікі.
«Калі ў нас на рахунак і патрапіць што, то за гэтымі грашыма адразу чарга, -- распавядае супрацоўніца дывановага камбіната. -- Мы паўсюль напазычалі, і хто першы грошы забярэ, невядома. Хто першы паспее, той і забярэ: ці тое Беларусбанк, ці тое Брэстэнерга. Не, не Белгазпрамбанк».
А на панчошным камбінаце адна супрацоўніца прызналася: «Дывановы камбінат павінен Белгазпрамбанку. Тыя ўзялі запазычанасць дыванамі. Звярнуліся да нас. Мы апыталі праз нашы прафсаюзы, ці хочуць людзі па такім кошце ўзяць дываны. Пагадзіліся людзі, і мы ў рахунак заработнай платы прадалі. Вось і ўсё».
Ніхто з адміністрацыі прадпрыемстваў-удзельнікаў не сказаў, ці цалкам згашаны дзякуючы гешэфту доўг. Адно вядома: склады дывановага камбіната трохі раставарыліся.
Як сказалі працаўніцы панчошнага камбіната, ім трэба моцна напружыцца, каб зарабіць 600-700 тысяч у месяц. Дывідэнды там выдаюць шкарпэткамі і панчохамі.
Электралампавы завод працуе 4 дні на тыдзень. Відэлец заробкаў складае 250-500 тысяч.
На дывановым наогул «трохдзёнка». Як паведаміў адзін з супрацоўнікаў, «людзі ідуць у адпачынак за свой кошт, каб ухапіць якую-небудзь халтурку, або за 2\3 «голай» стаўкі ходзяць падпісваць з 10 да 11 гадзін дзёнку, а потым ідуць дадому. Але «на кароткім ланцужку»: таму што як выклікалі — павінен з'явіцца. І за гэта выходзіць каля ста тысяч на месяц».
