Мінфін: Выдаткі бюджэту Беларусі скарочаныя на 20%

Выдаткі бюджэту Беларусі скарочаныя на 11 трыльёнаў беларускіх рублёў.

План па прыбытках рэспубліканскага бюджэту скарочаны на Br8 трлн, ці на 15% з улікам запланаванага ў канцы 2008 года дэфіцыту бюджэту-2009 у памеры Br2,8 трлн, ці 1,81% ВУП, паведамляе «Інтэрфакс».

Рэспубліканскі бюджэт-2009 быў прыняты «парламентам» восенню 2008 года з прыбыткамі Br54,86 трлн і выдаткамі Br57,66 трлн.

У адпаведнасці з праведзенай карэктоўкай бюджэту, зацверджанай указам Лукашэнкі, прыбыткі і выдаткі рэспубліканскага бюджэту на 2009 год зацверджаныя ў суме Br54,9 трлн пры нулявым дэфіцыце.

Такім чынам, фактычна «выдаткі рэспубліканскага бюджэту скарочаныя на вельмі значную суму», — падкрэсліў прадстаўнік Мінфіна. У першую чаргу, скарачэнне закранула фінансаванне дзяржпраграмаў і капукладанняў бюджэту.

У Мінфіне не выключаюць у перспектыве нейкай лібералізацыі бюджэтнай палітыкі, якая стала больш жорсткай пад уплывам крызісу, і звязваюць гэта з працай эканомікі.

Як паведамлялася, Міністэрства фінансаў Беларусі выканала рэспубліканскі бюджэт у студзені-сакавіку 2009 года з прафіцытам Br1 трлн, ці 3,4% ВУП. Прыбыткі рэспубліканскага бюджэту (з улікам фонду сацабароны) у студзені-сакавіку 2009 года склалі Br9,9 трлн (на 5,6% менш, чым за студзень-сакавік 2008 года). Расходная частка бюджэту ў студзені-сакавіку сфармаваная ў памеры Br8,9 трлн (на 2% больш, чым у I квартале 2008 года).

У снежні 2008 года, у адпаведнасці з указам прэзідэнта, бюджэт-2009 стаў бездэфіцытным, паколькі наяўнасць бездэфіцытнага бюджэту была адным з патрабаванняў МВФ пры вылучэнні Беларусі крэдыту stand-by. Але гэты дакумент абмяжоўваўся толькі канстатаваннем таго, што рэспубліканскі бюджэт-2009 з'яўляецца бездэфіцытным.

У 2008 годзе Мінфін выканаў рэспубліканскі бюджэт з прафіцытам Br926 млрд, ці 0,7% ВУП, пры планавым дэфіцыце Br2,1 трлн, ці 1,9% ВУП. У снежні ўказам прэзідэнта планавы дэфіцыт бюджэту-2008 быў зменшаны да Br344,7 млрд (0,25% ВУП). Кансалідаваны бюджэт у 2008 годзе выкананы з прафіцытам Br1,8 трлн, ці 1,4% ВУП.

Бездэфіцытны па выніках 2009 года бюджэт Беларусі з'яўляецца адным з трох колькасных крытэраў рэалізацыі праграмы ўрада, якая падтрымліваецца крэдытам МВФ. Пры гэтым на працягу гэтага года рэспубліканскі бюджэт Беларусі павінен выконвацца з прафіцытам: не менш чым Br400 млрд па выніках I квартала і I паўгоддзя і не менш чым Br1,1 трлн за студзень-верасень.