Колькасць пагадненняў куплі-продажу маёмасці знізілася ў 40 разоў
1- 11.05.2009, 9:35
З-за пагаршэння плацежаздольнасці ў Гомелі рэзка скарацілася колькасць пагадненняў куплі-продажу маёмасці, якія здзяйсняюцца праз натарыяльныя канторы.
Пра гэта odsgomel.org паведаміў працаўнік адной з натарыяльных кантораў горада, які пажадаў застацца невядомым:
– У асноўным, гэта былі купля і продаж кватэраў і аўтамабіляў. Зараз плынь прыкладна разоў у сарок меншая. Гэта значыць, было 120 пагадненняў, засталося тры.
Такая шакавальная інфармацыя прымушае рабіць выснову, што ў горадзе замірае рух капіталу. Калі ўзгадаць, што, паводле апошніх сацыялагічных даследаванняў, толькі траціна беларусаў пачалі эканоміць з прычыны крызісу, дык карціна становіцца яшчэ больш трывожнай.
Калі выказаць здагадку, што эканоміць пачалі людзі, найбольш дасведчаныя ў фінансавых справах (а менавіта такія і валодаюць, у большай ступені, сродкамі для здзяйснення буйных пагадненняў), дык скарачэнне продажаў аўтамабіляў і кватэраў становіцца зразумелым. Пытанне толькі, што будзе з эканомікай рэгіёна, калі эканоміць па-сапраўднаму (ці скарачаць выдаткі па неабходнасці) стануць усё астатнія: на харчаванні, вопратцы, забавах. Прыпыненне руху капіталу, як правіла, прыводзіць да сціскання рынкаў, прыпынення вытворчасці, падзення прыбыткаў насельніцтва, беспрацоўя.
