Супраць гендырэктара «МАЗ-цэнтра» узбуджаная крымінальная справа

Былы гендырэктар ГД «МАЗ-цэнтр» Сяргей Малюцін вінаваціцца ў буйных крадзяжах.

23 сакавіка стала вядома аб узбуджэнні крымінальнай справы па факце махлярства ў адмыслова буйным памеры ў адносінах Сяргея Малюціна, былога генеральнага дырэктара ТАА «Гандлёвы дом "МАЗ-цэнтр"» (афіцыйны прадстаўнік беларускага заводу МАЗ у Расеі).

Яго падазраюць у крадзяжы 22,5 млн руб., заплачаных за пастаўку грузавікоў былым дылерам МАЗа — кампаніяй «Альфа-мотарс», паведамляе «Коммерсант».

Крымінальная справа ў адносінах Сяргея Малюціна была ўзбуджаная 18 сакавіка следчым упраўленнем пры УУС Паўночнай акругі Масквы па заяве генеральнага дырэктара «Альфа-мотарс» Міхаіла Алтуніна.

«Мы не дамагаліся крымінальнага пераследу канкрэтна Малюціна. Проста стаміліся чакаць выканання гандлёвым домам «МАЗ-цэнтр» сваіх абавязанняў па заключаных дамовах»,— сказаў Алтунін.

Па словах Міхаіла Алтуніна, у 2008 годзе кампанія «Альфа-мотарс» склала з прадстаўніком МАЗа шэраг дамоваў на пастаўку грузавікоў і іншай прадукцыі. Па гэтых дамовах гандлёваму дому «МАЗ-цэнтр» было пералічана больш за 68,5 млн руб., але той недапаставіў тэхніку на суму, якая перавышае 22,5 млн руб.

«Наступнае выкананне сваіх абавязанняў перад намі гандлёвы дом прыпыніў па прычыне таго, што ў іх змянілася кіраўніцтва, а ранейшае нібыта знішчыла ўсю аперацыйную базу дадзеных. З тых часоў мы вядзем беспаспяховыя перамовы па ўрэгуляванні запазычанасці ўжо з новым кіраўніцтвам прадстаўніцтва МАЗа»,— адзначыў Алтунін.

Па ягоных словахловам, прадстаўніцтва МАЗа «свой доўг прызнае, але дакументальна афармляць яго адмаўляецца». А у верасні мінулага года МАЗ, як сцвярджае Міхаіл Алтунін, без тлумачэння прычын пазбавіў «Альфа-мотарс» статуса афіцыйнага дылера МАЗа.

Па заяве Міхаіла Алтуніна, аператыўнікамі УБЭЗа была праведзеная праверка, на падставе матэрыялаў якой і была ўзбуджаная крымінальная справа. Па версіі следства, у здарэнні вінаваты былы гендырэктар гандлёвага дома «МАЗ-цэнтр» Сяргей Малюцін.

Следства падазрае, што ўжо ўлетку 2008 года, складаючы дамовы з «Альфа-мотарс» на пастаўку грузавікоў, Малюцін «меў намер крадзежа грашовых сродкаў».

Прадстаўнікі следства сцвярджаюць, што Сяргей Малюцін, «выкарыстоўваючы сваё службовае становішча», наўмысна недапаставіў тэхніку дылеру МАЗа, і перавёў 22,5 млн руб. на рахункі падстаўных падкантрольных яму кампаній.

Атрымаць каментар самога Сяргея Малюціна і ягоных адвакатаў 23 сакавіка не атрымалася. Па некаторых дадзеных, зараз Малюцін знаходзіцца за мяжой.

Учора ж інфармацыйнае агенцтва РБК высунула сваю версію адмовы гандлёвага дома «МАЗ-цэнтр» выканаць абавязанні перад кампаніяй «Альфа-мотарс». Нібыта звязана гэта з тым, што гандлёвы дом «МАЗ-цэнтр» фактычна з'яўляецца банкрутам: завод дагэтуль не адгрузіў расейскім дылерам каля 800 адзінак аўтатэхнікі.

«Правядзенне працэдуры банкруцтва мы не плануем, і ніякай сур'ёзнай запазычанасці па адгрузцы тэхнікі перад контрагентамі ў нас няма. Існуе працоўная запазычанасць у некалькі адзінак»,— паведаміў гендырэктар гандлёвага дома «МАЗ-цэнтр» Уладзімір Казак.

Каментаваць інфармацыю аб узбуджэнні крымінальнай справы ў адносінах свайго папярэдніка Ўладзімір Казак адмовіўся, спаслаўшыся на адсутнасць афіцыйнай інфармацыі. Ён таксама не змог пацвердзіць або аспрэчыць дадзеныя аб доўгу ў памеры 22,5 млн руб. перад «Альфа-мотарс».

«Я знаходжуся у пасадзе гендырэктара нядаўна, з 24 снежня 2008 года, і пакуль не скончыў зверку фінансава-гаспадарчай дзейнасці з контрагентамі, у тым ліку і з "Альфа-мотарс"»,— сказаў Казак.

У сваю чаргу, камерцыйны дырэктар МАЗа Аляксандр Захарчанка сказаў, што Менскі аўтазавод «не нясе ніякай адказнасці за дзейнасць» свайго гандлёвага дома ў Расеі.

ТАА «Гандлёвы дом "МАЗ-Цэнтр"» зарэгістраванае ў маі 2004 года, з'яўляецца 100-адсоткавай даччынай кампаніяй Менскага аўтамабільнага заводу. Створанае для каардынацыі паставак аўтамабіляў МАЗ у Расею, займаецца размеркаваннем прадукцыі заводу сярод афіцыйных дылераў, усталёўвае адзіныя кошты, распрацоўвае і рэалізуе маркетынгавыя праграмы на расейскім рынку.

Даччыныя прадпрыемствы — ТАА «Тэрмінал-МАЗ-Цэнтр», ТАА «Цэнтральны склад "Торгмазаўта"». У 2006 годзе выручка кампаніі склала 7,4 млрд руб., прыбытак — 700 тыс. У наступным паказчыкі не раскрываліся. Па дадзеных Менскага аўтазавода, у 2008 годзе ў Расеі рэалізавана каля 15 тыс. адзінак аўтатэхнікі маркі «МАЗ».