Туркменам забаронена адзначаць навагоднія святы ў рэстаранах і кафэ

Забарону ўвёў кіраўнік краіны Гурбангулы Бердымухамедаў.

Як паведамляе ИА «Фергана.Ру» са спасылкай на свае крыніцы ў Ашхабадзе, рашэнне было прынята ў сувязі з нядаўнім пажарам у расейскім начным клубе «Кульгавы конь», у выніку якога загінулі больш за 150 чалавек.

Забарона працягнецца да 3 студзеня 2010 года.

Як адзначае агенцтва, ужо з 20 снежня ўстановы грамадскага харчавання не прымаюць ад жыхароў Туркменістана заяўкі на навагоднія вечары. Дамовы з тымі, хто замовіў рэстаран раней, былі скасаваныя.

Паводле інфармацыі «Ферганы.Ру», забарона закранула не ўсе рэстараны. Выключэнні зроблены для ўстаноў, якія належаць сваякам прэзідэнта. Там адзначаецца наплыў наведвальнікаў у сувязі з тым, што дзейнасць іншых рэстаранаў абмежавана.