Чаргінец стварае Саюз пісьменнікаў неіснуючага «саюза»
18- 1.12.2009, 16:35
4 снежня ў Менску будзе створаны Саюз пісьменнікаў «саюзнай дзяржавы» Беларусі і Расеі.
Пра гэта, як паведамляе «РИА Новости», заявіў старшыня праўладнага Саюза пісьменнікаў Беларусі Мікалай Чаргінец.
«Стварыць Саюз пісьменнікаў «саюзнай дзяржавы» мы плануем на сумесным з’ездзе Саюза пісьменнікаў Беларусі і Саюза пісьменнікаў Расеі, які адбудзецца ў пятніцу ў Менску ў будынку Нацыянальнай бібліятэкі», - распавёў Чаргінец.
Паводле Чаргінца, у Саюз пісьменнікаў «саюзнай дзяржавы» не будуць аўтаматычна ўключацца сябры саюзаў пісьменнікаў Беларусі і Расеі. «У новую арганізацыю ўвойдуць толькі тыя пісьменнікі, хто падзяляе ідэі «саюзнай дзяржавы» і гатовы сваёй творчасцю ўмацоўваць братэрскія сувязі народаў Беларусі і Расеі», - сказаў Чаргінец.
Паводле яго словаў, у пятніцу плануецца зацвердзіць статут і абраць кіруючыя органы Саюза пісьменнікаў «саюзнай дзяржавы». На пасаду сустаршыняў, паводле дадзеных Чаргінца, вылучаныя ён сам і старшыня Саюза пісьменнікаў Расеі Валер Ганічаў.
