На выездзе з Менска перавярнуўся КамАЗ з асфальтам (Відэа)
2- 19.11.2009, 13:36
Буйная аварыя адбылася на галоўнай аўтамабільнай магістралі краіны. Гружаны асфальтам КамАЗ дарожнай службы перавярнуўся на выездзе з Менска.
Грузавік рухаўся па крайняй правай паласе, нечакана ірвануў да раздзяляльнай агароджы і перакуліўся на яе. Металічная канструкцыя не дазволіла шматтоннай машыне выляцець на ажыўленую сустрэчную паласу, перадае БелаПАН.
Кіроўца КамАЗа сур'ёзна не пацярпеў. Адразу пасля аварыі ён не змог патлумачыць прычыну кульбіта. Улічваючы інтэнсіўнасць руху на трасе М1 і вагу грузавіка, адсутнасць пацярпелых супрацоўнікі ДАІ назвалі шчаслівай выпадковасцю.
