«Беларуськалій» стаіць, следства ідзе

Генеральная пракуратура ўзбудзіла новыя крымінальныя справы па дзейнасці злачыннай групы на РУП «ПА «Беларуськалій» і ТАА «Белрасмаш».

На сённяшні дзень следчыя налічылі больш за 10 млрд рублёў шкоды, якая была прычыненая прадпрыемству службовымі асобамі аб'яднання і прадстаўнікамі камерцыйных структур, піша «Ежедневник».

У цяперашні час пад вартай ужо знаходзяцца намеснік начальніка аддзела агульназавадскога абсталявання і вядучы спецыяліст службы эканамічнай бяспекі прадпрыемства. Крымінальныя справы ўзбуджаныя таксама ў адносінах дырэктара і ягонага намесніка ТАА «Белрасмаш». Аднак дадзеныя следства кажуць, што ў злачынную дзейнасць былі ўцягнутыя і некаторыя службовыя асобы ўпраўлення матэрыяльна-тэхнічнага забеспячэння РУП «ПА «Беларуськалій». Генеральная пракуратура пры падтрымцы аператыўнікаў Галоўнага ўпраўлення па барацьбе з арганізаванай злачыннасцю МУС цяпер спрабуюць усталяваць, хто яшчэ са службовых асоб прадпрыемства ведаў аб бязладдзях, якія адбываюцца на тэндэрах, і атрымліваў адкаты ад прадстаўнікоў камерцыйных структур.

Па папярэдніх дадзеных, гаворка ідзе не толькі аб нанясенні шкоды РУП «ПА «Беларуськалій», але і аб стварэнні небяспечных умоў працы для шахцёраў з-за неадпаведнасці абсталявання, якое пастаўлялася, неабходным патрабаванням.

Так, напрыклад, пры правядзенні ў феврале-сакавіку 2008 года тэндэру па закупе камплектуючых трансфарматарных падстанцый выбуховабяспечнага тыпу былі парушаныя парадак і ўмовы правядзення конкурсу. Прасцей кажучы, некаторыя ўдзельнікі тэндэрнай камісіі, ведаючы аб тым, што ў дакументах паказаныя няслушныя звесткі аб вытворцы трансфарматарных падстанцый і аб тым, што іх тэхнічны стан не адпавядае ўсталяваным нормам, схавалі гэтую інфармацыю і стварылі ільготныя ўмовы для заключэння кантрактаў на пастаўку абсталявання ад ТАА «Гандлёвы дом «Электрамашына».

Паміж тым, як высвятлілася ў наступным, набытае абсталяванне наогул нельга было выкарыстаць у працы РУП «ПА «Беларуськалій», бо гэта магло прывесці да вельмі жаласных наступстваў, у тым ліку да магчымага выбуху і чалавечых ахвяр. Дзякуй Богу, абсталяванне не было ўсталяванае, бо своечасова было заўважана, што яно не адпавядае неабходным тэхнічным нормам. Аднак больш за 6 млрд рублёў апынуліся выкінутымі на вецер. І гэта толькі па адной угодзе. Падобная сітуацыя адбылася і пры пастаўцы на РУП «ПА «Беларуськалій» 32 электрарухавікоў. І не толькі іх.

Па дадзеных следства, вядучы спецыяліст службы эканамічнай бяспекі і іншыя службовыя асобы прадпрыемства на працягу некалькіх гадоў атрымлівалі адкаты за перамогі на тэндэрах. Напрыклад, за перамогу ў тэндэры на пастаўку электрарухавікоў прадстаўнікі магілёўскага ТАА «Руселпрам-Бел» заплацілі 36 тыс. даляраў. У іншым выпадку гэта было ўжо 40 тыс. даляраў. Сума хабараў залежыла ад сумы ўгоды, якая складалася пасля перамогі ў тэндэры.

Ужо цяпер (хоць да канца расследавання яшчэ далёка) можна казаць аб тым, што справа злачыннай групы на РУП «ПА «Беларуськалій» стане адной з самых буйных вытворчых спраў за апошні час. Па папярэдніх адзнаках, сукупная шкода па заканчэнні следства можа вылічацца дзясяткамі мільёнаў даляраў. Колькі людзей адкусіла ад гэтага пірага, пакуль сказаць складана, але іх сапраўды будзе не менш за дзясятак.

Па дадзеных следства, злачынная група дзейнічала на РУП «ПА «Беларуськалій» з 2005 года па жнівень 2008-га. За гэты час яна змагла ўцягнуць у супрацьпраўную дзейнасць вялікую колькасць людзей, якія па сваіх службовых абавязках павінныя былі кантраляваць якасць абсталявання, якое пастаўлялася. Фактычна на працягу чатырох гадоў вакол РУП «ПА «Беларуськалій» сфарміраваўся пул з набліжаных камерцыйных структур, якія выпампоўвалі з прадпрыемства грошы.