Адзін з лідэраў Партыі БНФ зьняўся з «выбараў»

Намесьнік старшыні Партыі БНФ Аляксей Янукевіч у панядзелак зьняў сваю кандыдатуру з выбараў. Палітык быў зарэгістраваны ў менскай Аўтазаводзкай акрузе.

Янукевіч так патлумачыў гэтае рашэньне: «Насамрэч я вельмі заклапочаны неапраўданым крэнам у стасунках заходніх краінаў да беларускага рэжыму, што назіраецца апошнім часам. Ужо сёньня відавочна, што выбары ня могуць адбыцца адкрытымі і дэмакратычнымі. Апазыцыя адхіленая ад кантролю выбараў. Сытуацыя, калі новы склад палаты можа быць прызнаны эўрапейскімі краінамі, вельмі небясьпечная ў доўгатэрміновай пэрспэктыве. Зьняцьцё з выбарчай кампаніі — гэта самае малое, што я магу зрабіць, каб не дапусьціць падобнае».

Як ужо паведамляў прэс-цэнтр Хартыі’97, Сойм Партыі БНФ на паседжанні 20 верасня перафармуляваў сваё папярэдняе рашэнне аб зняцці кандыдатаў у «дэпутаты» ад партыі з «парламенцкіх выбараў».

30 жніўня сойм прыняў рашэнне аб тым, што кандыдаты ў «дэпутаты» ад Партыі БНФ абавязкова не пазней за 23 верасня павінны звярнуцца ў акруговыя выбарчыя камісіі з заявамі аб выхадзе з «выбарчай кампаніі». На паседжанні 20 верасня гэты пункт быў зменены. У адпаведнасці з гэтым рашэннем кандыдаты ў «дэпутаты» могуць зняцца з «выбараў».

Аднак на Сойме таксама прынятае рашэнне, што кожны кандыдат ад партыі, які мае намер ісці на «выбары» да канца, абавязаны падпісаць заяву аб тым, што лічыць гэтыя «выбары» несвабоднымі і несправядлівымі, а таксама ніколі не прызнае «палату прадстаўнікоў» легітымным органам. У гэтай заяве кожны кандыдат павінен прывесці аргументы ў карысць гэтай пазіцыі. Галоўны аргумент -- нядопуск прадстаўнікоў апазіцыйных палітычных партыяў ва ўчастковыя выбарчыя камісіі. Далей кандыдат павінен пералічыць тыя парушэнні выбарчага заканадаўства, з якімі яму прыйшлося сутыкнуцца падчас працы ў сваёй акрузе.