Будаўніцтва АЭС могуць абвясціць «народнай будоўляй»

Нацыянальная акадэмія навук Беларусі прапаноўвае абвясціць будаўніцтва АЭС у краіне «народнай будоўляй».

"Мы нават занеслі прапанову абвясціць будаўніцтва "народнай будоўляй": навошта займаць у кагосьці, калі мы ведаем з банкаўскай і фінансавай статыстыкі, што шмат сродкаў насельніцтва ляжыць, якія можна накіраваць на фінансаванне будаўніцтва", - паведаміў на прэс-канферэнцыі вядучы навуковы супрацоўнік інстытута сацыялогіі Нацыянальнай акадэміі навук Беларусі Міхаіл Хурс, перадае «Інтэрфакс».

Ён таксама распавёў, што інстытут сацыялогіі правёў у снежні 2007 - лютым 2008 года сацапытанне, падчас якога па выпадковай выбарцы было апытана 2011 рэспандэнтаў ва ўсіх рэгіёнах краіны.

"Мы замерылі, наколькі народ гатовы ўкладваць свае вольныя сродкі ў будаўніцтва АЭС", - паведаміў сацыёлаг, падкрэсліўшы, што паказчык згодных "досыць сур'ёзная лічба - 49%".

Ён лічыць, што "магчыма ў наступным годзе варта больш дэталёва вывучыць гэтае пытанне".

Навуковец таксама дадаў, што падчас апытання рэспандэнтам было прапанавана адказаць на пытанне аб тым, з якіх крыніц павіннае фінансавацца будаўніцтва АЭС, апытанае насельніцтва адказала: "з дзяржаўных мэтавых, бюджэтных крыніц" (40,7% рэспандэнтаў), "за кошт замежных інвестыцый" (17,8%), "павінныя выкарыстоўвацца ўсе магчымыя крыніцы" (29,7%), "за кошт мэтавага прыцягнення па доўгатэрміновых дэпазітах вольных сродкаў насельніцтва" (2,3%), "за кошт доляў унутраных інвестыцый" (5%), "іншых крыніц" (2,8%).

М.Хурс лічыць, што калі зрабіць умовы ўдзелу ў будаўніцтве выгоднымі і растлумачыць гэта насельніцтву, то доля жыхароў краіны, гатовых удзельнічаць у фінансаванні АЭС, можа павялічыцца. "Вядома, можа, нам і не выцягнуць будаўніцтва цалкам за кошт насельніцтва, але адназначна, што гэты важны рэсурс можна максімальна прыцягнуць: ад гэтага выйграюць усе - і насельніцтва, і рэспубліка", - падкрэсліў ён.

Як распавёў начальнік вытворча-тэхнічнага аддзела Дырэкцыі будаўніцтва атамнай станцыі Віталь Малішэўскі, у межах мерапрыемстваў па працы інфармаванні насельніцтва аб будаўніцтве АЭС у Беларусі пры дырэкцыі будзе створаны сектар па інфармаванні і інтэрнэт-сайт, прысвечаны развіццю атамнай энергетыкі ў краіне. Ён дадаў, што "пасля сектар можа перарасці ў інфармацыйны цэнтр, аналагічны тым, якія ствараюцца пры АЭС у шматлікіх краінах".

Як паведамлялася, у Беларусі на 1 верасня 2008 года банкаўскія ўклады насельніцтва перавысілі эквівалент Br13 трлн, павялічыўшыся за студзень-жнівень на 24,6%. Намінальны налічаны сярэднемесячны заробак працаўнікоў рэспублікі ў студзене-ліпені склаў Br832,8 тыс., у тым ліку ў ліпені Br923,3 тыс. і павялічыўся ў параўнанні з чэрвенем 2008 года на 3,5%.

У Беларусі плануецца пабудаваць АЭС з двума блокамі на 1 тыс. Мвт кожны, абсталяванымі вода-вадзянымі рэактарамі.

Будаўніцтва беларускай атамнай станцыі плануецца пачаць у канцы будучага года, а прыступіць да стварэння аб'ектаў інфраструктуры - у канцы бягучага - пачатку будучага года. Па розных адзнаках, кошт праекту можа скласці $4-6 млрд. Увядзенне першага блока вызначанае на 2016 год, другога - на 2018 год.