Еўразвязу не варта адмяняць санкцыі супраць беларускага рэжыма

Былыя палітычныя зняволеныя не лічаць сваё вызваленне падставай для перагляду пазіцыі Еўразвяза ў адносінах Беларусі.

26 жніўня ЕЗ заявіў, што ягоныя сябры "вітаюць вызваленне двух апошніх палітвязняў Сяргея Парсюкевіча і Андрэя Кіма". "Іх вызваленне ўслед за пяццю адпушчанымі ў пачатку года палітвязнямі і вызваленнем Аляксандра Казуліна азначае, што ў Беларусі больш няма міжнародна прызнаных палітычных зняволеных. Такое развіццё падзей стварае магчымасць для аднаўлення дыялогу з беларускімі ўладамі і магчымасць перагляду абмежавальных мер у адносінах Беларусі", — гаварылася ў заяве.

У інтэрв'ю БелаПАН былы палітвязень А.Кім адзначыў: "Палітыка крокаў насустрач адзін аднаму прадугледжвае зваротныя крокі. Улады Беларусі зрабілі крок — вызвалілі мяне, Парсюкевича і Казуліна. Аднак крокі, якія прывялі да нашага вызвалення, не з'яўляюцца нашай поўнай рэабілітацыяй. Мы працягваем дамагацца поўнай рэабілітацыі і рэабілітацыі ўсіх, хто быў асуджаны за акцыі пратэсту прадпрымальнікаў зімой гэтага года. Мне здаецца, Еўропа павінная гэта ўлічваць".

Прыкладна такога жа пункту гледжання прытрымваецца С.Парсюкевіч. "Дыялог — справа патрэбная і карысная. Аднак Еўропе важна ўсведамляць, што гэты дыялог можа ператварыцца ў маналог. Беларускія ўлады могуць "браць у закладнікі" сваіх грамадзян і патрабаваць у адказ на іх выпуск нейкіх прэферэнцый у адносінах вышэйшага кіраўніцтва краіны, інвестыцый і г. д. Вызваленне трох чалавек яшчэ нічога не значыць. Нас вызвалілі, але не знялі судзімасць, не рэабілітавалі. Акрамя таго, за ўдзел у акцыях пратэсту прадпрымальнікаў асуджаныя і іншыя людзі, якія значна абмежаваныя ў правах".