Аляксандр Мех: «Якое бы рашэнне не прыняў суддзя, яно будзе палітычным»
3- 20.08.2008, 17:32
Сёння ў судзе Кобрынскага раёна пачаўся разгляд справы былога інжынера ААТ «Белтрансгаз», сябра Партыі БНФ Аляксандра Меха супраць Кобрынскага ўпраўлення магістральных газаправодаў ААТ «Белтрансгаз».
Аляксандр Мех, звольнены з пасады інжынера Кобрынскага ўпраўлення магістральных газаправодаў 30 чэрвеня, лічыць, што адбылося гэта па палітычных матывах.
Ён патрабуе аднавіць яго на працы і выплаціць кампенсацыю за час змушаных прагулаў у памеры крыху больш за 3 мільёны беларускіх рублёў.
Таксама Мех патрабуе кампенсавання маральнай шкоды ў памеры 1 мільёна беларускіх рублёў і спынення ягонай дыскрымінацыі па палітычных матывах.
Справу разглядае суддзя Аляксандр Бабаскін. Прадстаўнік адказніка – менскі юрыст Аксана Мельнікава.
Аўдыёзапіс гутаркі Меха з начальнікам Кобрынскага ўпраўлення магістральных газаправодаў ААТ "Белтрансгаз" Уладзімірам Галашка і начальнікам Кобрынскага аддзела КДБ Андрэем Басько - падчас якой яму адкрыта заявілі, што ягонае звальненне звязанае з удзелам у парламенцкіх выбарах - да справы далучаны не была. Суд палічыў, што гэты запіс быў здабыты з парушэннем заканадаўства.
Андрэй Басько на слуханне справы не з'явіўся.
Слуханне справы, якое скончылася сёння спрэчкамі, працягнецца заўтра. На 21 жніўня прызначаны выступ пракурора і прыняцце рашэння.
Аляксандр Мех у інтэрв'ю «Народнай волі» заявіў, што «якое бы рашэнне не прыняў суддзя, яно будзе палітычным і напісанае будзе не ў кабінеце суддзі, а ў кабінетах тых людзей, якія цяпер кіруюць выбарчым працэсам».
