Беніта Ферэра-Вальднер: «Беларускія ўлады ўпусцілі магчымасць устаць на шлях дэмакратызацыі»

Камісар Еўразвяза па знешняй палітыцы і палітыцы добрасуседства Беніта Ферэра-Вальднер асудзіла новы беларускі закон "Аб сродках масавай інфармацыі".

Як адзначаецца ў заяве камісара ЕЗ, прыняты закон "працягне абмежаванне свабоды прэсы ў Беларусі", паведамляе БелаПАН.

"Я шкадую, што ў гэты закон не былі ўключаныя рэкамендацыі Міклаша Харашці, прадстаўніка АБСЕ па пытаннях свабоды СМІ, які супрацоўнічае з беларускімі ўладамі. Гэта была магчымасць для беларускага кіраўніцтва палепшыць становішча СМІ Беларусі, устаўшы на шлях дэмакратызацыі, і гэтая магчымасць выпушчаная", — канстатуе Б.Ферэра-Вальднер. Пры гэтым яна падкрэслівае, што "свабода прэсы — важная складовая частка дэмакратыі".

Еўракамісар заклікала беларускія ўлады "выправіць сітуацыю напярэдадні парламенцкіх «выбараў» 28 верасня".

Б.Ферэра-Вальднер нагадала аб прапанове ЕЗ пашырыць супрацоўніцтва з Беларуссю, калі беларускія ўлады "распачнуць пераканаўчыя крокі ў накірунку дэмакратыі і захаванні правоў чалавека, у прыватнасці, вызваліўшы ўсіх палітычных зняволеных, гарантаваўшы свабоду СМІ і дэмакратычны ход выбарчай кампаніі выбараў у «парламент»". "Падобныя змены да лепшага дазволяць Еўразвязу пайсці насустрач", — гаворыцца ў заяве.

Нагадаем, законапраект аб СМІ быў прыняты беларускім «парламентам» у рэкордна кароткія тэрміны. 17 чэрвеня ніжняя «палата» прыняла яго ў першым чытанні, 24 чэрвеня — у другім; 28 чэрвеня законапраект быў ухвалены верхняй «палатай». Зараз дакумент павінен падпісаць Лукашэнка. Новы закон уступіць у сілу праз шэсць месяцаў пасля афіцыйнага апублікавання.

У выпадку прыняцця гэтага дакумента ў цяперашняй рэдакцыі па незалежных сродках масавай інфармацыі будзе нанесены непапраўны ўдар, лічаць у Беларускай асацыяцыі журналістаў (БАЖ).

Найбольшыя турбота ў незалежнай журналісцкай супольнасці выклікае той факт, што ўлады змогуць блакаваць усе інтэрнэт-СМІ, не зарэгістраваныя ў Беларусі ў якасці сродку масавай інфармацыі.

Паводле праекту закона аб СМІ, пералік парушэнняў, за якія можна вынесці папярэджанне ў адрас рэдакцый, размыты і неабмежаваны, а прыпыніць выданне друкаванага СМІ можна нават за адно папярэджанне. Пры гэтым выносіць папярэджанні зможа суддзя, пракурор або чыноўнік любога райцэнтра.