Студэнтаў за мяжу не пусцяць?

Беларускі ўрад збіраецца да лета зрабіць больш жорсткімі правілы выезду студэнтаў на навучанне і працу за мяжу. Падставай для чарговага закручвання гаек можа паслужыць такая тэндэнцыя: маладыя беларусы ўсё часцей змяняюць родныя ВНУ і прадпрыемствы на замежныя.

Найбольшае распаўсюджванне гэтая тэндэнцыя атрымала ў дзяржсектары, у тым ліку сярод службоўцаў Міністэрства адукацыі Беларусі. Як атрымалася высветліць «Ежедневнику», замежныя альма-мацеры і кадравыя агенцтвы вабяць выхаванцаў высакародных сямействаў ужо даўно. Самымі запатрабаванымі дагэтуль з'яўляюцца еўрапейскія і расейскія ўніверсітэты і фірмы.

Менавіта расейскім землям аддала перавагу ў свой час дачка цяперашняга міністра адукацыі Аляксандра Радзькова. Варта адзначыць, што зрабіць кар'еру ў Расеі ў прынцыпе па плячу любому беларусу. Былі б жаданне ды стартавыя магчымасці, уключаючы талент і гнуткі розум. А вось замацавацца ў старой Еўропе значна складаней.

Па словах беларускіх праграмістаў, якія не так даўно падаліся на вольную нямецкую збажыну, працаўладкавацца з беларускім дыпломам у ЕЗ вельмі складана. Тыя ж немцы аддаюць перавагу альбо сваім суграмадзянам, альбо эмігрантам з падвойнай адукацыяй: беларускім і нямецкім. Адсутнасць «мясцовай корачцы» выракае сушукальніка працы на нізкую зарплату і нявызначанасць у кар'ерным росце.

Такім чынам, перш, чым пакараць Еўразвяз, беларусы імкнуцца скончыць прэстыжныя еўрапейскія ўніверсітэты. Выключных пераваг пры працаўладкаванні беларусаў за мяжой еўрапейскі дыплом не дае, затое гарантуе бонусы ў выглядзе льготнай працэдуры падаўжэння візы і магчымасці бесперашкодна падшукваць працу цягам года.

Не выключанае, што па згаданым шляху пайшла дачка рэктара Беларускага дзяржаўнага ўніверсітэта Васіля Стражава, якая абрала для сябе нямецкія прасторы. Дачка намесніка міністра адукацыі Казіміра Фарына будуе свой лёс у Галандыі. Дачка дарадцы міністра па сувязях з СМІ і грамадскасцю Міністэрства адукацыі Віктара Іўчанкава на дадзены момант вучыцца на філалагічным факультэце БДУ і адначасова ў Еўрапейскім гуманітарным універсітэце.

Увогуле, па словах працаўнікоў Міністэрства адукацыі, папулярнасць заходніх ВНУ расце ў Беларусі даволі ўстойліва. Вельмі прэстыжна працаўладкавацца і ў расейскай кампаніі, не гаворачы ўжо пра заходнія. Улічваючы, што ў Беларусі заходнія канторы прадстаўленыя вельмі слаба, рэальны шанец папрацаваць з высокімі тэхналогіямі або элітнымі брэндамі ў выпускнікоў айчынных ВНУ ёсць толькі за мяжой.

Акрамя таго, працоўны стаж у годнай замежнай кампаніі адчыняе дзверы ў кадравыя службы любых айчынных камерцыйных і дзяржаўных прадпрыемстваў. Пры гэтым зарплата спецыялістаў з такім досведам можа складаць ад 2 да 5 тысяч даляраў. Таму цалкам лагічна, што дзеці беларускіх службоўцаў спачатку спрабуюць свае сілы за мяжой. Аднак гэта не зусім задавальняе ўрад і Адміністрацыю прэзідэнта, дзе лічаць, што службоўцы павінны не толькі асабістым прыкладам, але і прыкладам сваіх дзяцей падтрымліваць імідж беларускага «цуда».

Занепакоенасць урада выклікае і той факт, што менавіта гэтым летам чакаецца, што замежныя кампаніі пачнуць рэкрутаваць беларускую моладзь з небывалай стараннасцю. Звязанае гэта найперш з катастрафічным недахопам кадраў у краінах – пачаткоўцах ЕЗ. Пасля ўступлення ў Еўрапейскі Звяз тыя ж Польшча і Літва не здолелі ўтрымаць сваіх спецыялістаў, якія з'ехалі шукаць лёс на больш перспектыўных рынках Нямеччыны, Францыі, Галандыі.

Як следства, спроба папоўніць дэфіцыт за кошт Беларусі і Расеі. Прывабіць беларускіх студэнтаў і выпускнікоў заходнія фірмы паспрабуюць у першую чаргу праз разнастайныя стажыроўкі і навучальныя праграмы. У гэтым выпадку беларускім уладам не застанецца нічога іншага, як зрабіць яшчэ больш жорсткімі правілы замежных ваяжоў для студэнтаў.