Стартавала прымусовая падпіска на дзяржаўную прэсу (Фота дакумента)

У распараджэнне журналістаў патрапіла копія «Плану арганізацыйных мерапрыемстваў правядзення падпіскі на друкаваныя СМІ на 1-е паўгоддзе 2009 года».

У дакуменце прапісаныя меры па павелічэнні тыражоў рэгіянальных дзяржаўных газет, па недапушчэнні паніжэння ведамасных тыражоў рэспубліканскіх і мясцовых выданняў, паведамляе Беларуская асацыяцыя журналістаў.

У прыватнасці, чыноўнікам Брэсцкай вобласці загадана правесці нарады з кіраўнікамі прадпрыемстваў і ўстаноў па арганізацыі падпісной кампаніі ў працоўных калектывах. У сваю чаргу кіраўнікі прадпрыемстваў і арганізацый усіх формаў уласнасці абавязаныя «не дапусціць паніжэння ведамасных тыражоў па асноўных рэспубліканскіх выданнях, дзяржаўных абласных і раённых газетах».

Ёсць у «плане» і пункт, які абавязвае кіраўнікоў «з мэтай пашырэння інфармацыйнага поля, захавання духоўнага і маральнага развіцця насельніцтва» забяспечыць афармленне падпіскі на друкаваныя СМІ кожным сябрам працоўнага калектыва.

Працаўнікі пошты атрымалі заданне «рапартаваць» кожны тыдзень ідэалагічным аддзелам аб ходзе падпіскі, а таксама прадастаўляць у аблвыканкам звесткі аб прадпрыемствах і арганізацыях, якія не аформілі падпіску альбо знізілі «заяўленыя тыражы».

«Гэта ўжо даўно не навіна, што ўлады падчас падпісной кампаніі задзейнічаюць адміністрацыйны рэсурс для падтрымкі дзяржаўнай прэсы. Адметнасць гэтага дакумента — у надзвычай падрабязным апісанні «абавязкаў» розных структур, — пракаментавала «план» брэсцкіх ідэолагаў старшыня БАЖ Жана Літвіна. –

Падобныя дакументы былі шырока распаўсюджаныя ў савецкі час, калі ўлада страшна баялася любой праявы вальнадумства. Для мяне гэта знак таго, што сёння ў краіне існуе маса праблем. І каб гэтыя праблемы схаваць, беларускія ўлады імкнуцца ўтрымліваць прытомнасць людзей пад кантролем.

А калі яшчэ і ўспомніць, што сёння практычна паўтара дзясятка незалежных грамадска-палітычных выданняў пазбаўленыя права распаўсюджвання, то карціна падпісной кампаніі ў Беларусі выглядае і зусім сумна».