Другія суткі застаецца закрытай мяжа Беларусі з Латвіяй

За гэты час латвійскія памежнікі ўсё ж прапусцілі восем легкавых аўтамабіляў.

Пераход «Рыгораўшчына – Патэрніекі» на мяжы Беларусі з Латвіяй не працуе з вечара пятніцы. У Рызе афіцыйна кажуць, што праблема там тэхнічная, але не ўдакладняюць, калі пункт пропуску адкрыецца, перадае «Белсат».

Увечары 31 ліпеня Улады Латвіі паведамілі пра часовае закрыццё пункта пропуску «Патэрніекі» — апошняга пераходу, які працаваў на мяжы з Беларуссю.

«Назіраюцца тэхнічныя збоі ў працы інфармацыйных сістэм, з-за чаго памежны кантроль на дадзены момант немагчымы. Прычыны і магчымы час вырашэння праблем пакуль незразумелыя», — паведаміла ў той дзень Памежная ахова Латвіі, і з таго часу дадатковай афіцыйнай інфармацыі не было.

Паводле звестак «Белтаможсэрвісу», цяпер выезду з Беларусі ў Латвію праз «Рыгораўшчыну» чакае адзін легкавік (вадзіцель зарэгістраваўся ў электроннай чарзе раніцай 1 жніўня) і 57 грузавікоў.

У Telegram-чатах падарожнікі сцвярджаюць, што з моманту абвяшчэння пра закрыццё пераходу латвійскія памежнікі ўсё ж прапусцілі 8 легкавых аўтамабіляў, верагодна, дзякуючы дзецям-пасажырам. Некаторым машынам давялося чакаць больш за суткі.

«Такім чынам, зразумела, што «збою» няма. Фізічна перайсці мяжу магчымасць ёсць, яна закрытая ў «ручным» рэжыме», — робяць выснову падарожнікі.

Тым часам нельга сказаць, што пасля закрыцця гэтага пункта пропуску істотна выраслі чэргі на іншых пераходах. У Брэсце цяпер, паводле даных Дзяржаўнага памежнага камітэта, выезду ў Польшчу чакае 500 аўтамабіляў — столькі ж было і ў мінулую нядзелю.

У Бераставіцы ў электроннай чарзе 80 легкавікоў, такая ж колькасць была і тыдзень таму.

У Брузгах цяпер 215 машын. Тут гэта нетыповая колькасць, хоць і не рэкордная: на мінулым тыдні было і 240.

На мяжы з Літвой у пунктах пропуску «Каменны Лог» і «Беняконі» — па 150 аўтамабіляў, такія чэргі там з’яўляюцца часта.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]