CNN раскрыла стратэгію Украіны па знясіленні расійскай СПА

Усе варыянты для Крамля дрэнныя.

Масіраваныя атакі ўкраінскіх беспілотнікаў на тэрыторыю РФ выявілі праблемы расійскай сістэмы супрацьпаветранай абароны (СПА), якая ўсё часцей вымушаная рэагаваць ва ўмовах хаосу і дэфіцыту рэсурсаў. Пра гэта гаворыцца ў аналізе CNN са спасылкай на ваенных экспертаў, якія адзначаюць, што стратэгія Украіны заключаецца ў знясільванні і перагрузе расійскай СПА вялікай колькасцю дронаў.

Паказальным прыкладам выданне лічыць украінскую атаку на Маскву ў чацвер. Адзначаецца, што калі шматлікія ўкраінскія дроны пачалі набліжацца да расійскай сталіцы, рэакцыя Расіі больш нагадвала хаатычную спробу справіцца з сітуацыяй, а не добра спланаваную стратэгічную абарону.

Кадры, правераныя журналістамі CNN і прааналізаваныя экспертамі, дэманструюць, як вайскоўцы страляюць з пераносных зенітна-ракетных комплексаў з пляча проста на загружанай аўтамабілямі трасе. На іншым відэа журналісты заўважылі, як расійская ракета СПА трапіла ў нафтавы рэзервуар. Эксперт па ўзбраеннях Стакгольмскага міжнароднага інстытута даследавання праблем міру Маркус Шылер заявіў, што гэта быў «аўтагол Расіі», які скончыўся грыбападобным воблакам дыму і тым, што вялізная верхняя частка рэзервуара ўзляцела ў паветра.

Паводле слоў Шылера, «у Расіі ёсць цэлы спіс састарэлых сістэм, якія не з’яўляюцца на 100% надзейнымі». У той жа час, кажа ён, Украіна пастаянна ўдасканальвае свае ўдарныя магчымасці «ўжо на працягу многіх гадоў».

Старшы аналітык McKenzie Intelligence Services Сцю Рэй таксама падкрэсліў хаатычнасць працы расійскай СПА.

«Відэа, на якім зафіксавана выкарыстанне пераносных зенітна-ракетных комплексаў на загружанай трасе, сведчыць пра паспешлівую, імправізаваную і, шчыра кажучы, непрафесійную рэакцыю на атаку. Поўная адсутнасць кантролю за рухам транспарту і выкарыстанне вайсковай тэхнікі ў непасрэднай блізкасці ад грамадзянскіх аўтамабіляў і людзей толькі пацвярджаюць гэтую ацэнку», – заявіў ён.

Украіна паслядоўна знішчала расійскую СПА

Журналісты нагадалі, што на пачатку вайны Расія засяродзіла свае сістэмы СПА на мяжы з Украінай і на лініі фронту, «але стратэгія Кіева палягала ў тым, каб атакаваць мноства розных мэтаў на акупаваных тэрыторыях усходу Украіны і ўнутры Расіі, прымушаючы Маскву разсяроджваць сістэмы СПА і ствараць больш слабую і разрэджаную сетку абароны».

Акрамя таго, Украіна цягам многіх гадоў наносіць удары па саміх пускавых устаноўках СПА, а таксама па радыёлакацыйных сістэмах выяўлення, імкнучыся аслабіць абарончыя магчымасці Расіі. Паводле даных Сіл абароны Украіны, з пачатку гэтага года яны знішчылі 166 расійскіх сродкаў СПА, а з пачатку паўнамаштабнага ўварвання ў 2022 годзе — больш за 1432.

Расійская СПА не прызначаная для барацьбы з дронамі

Даследчык па ваенных навуках Каралеўскага аб’яднанага інстытута абаронных даследаванняў (RUSI) у Лондане Томас Уітынгтан звярнуў увагу і на тое, што расійскія сістэмы СПА ствараліся не для барацьбы з атакамі беспілотнікаў, а для збівання вайсковых самалётаў, балістычных і крылатых ракет.

«Расійская СПА проста не адпавядае свайму прызначэнню, гэта абсалютна відавочна. Яна не абсталяваная для выяўлення, адсочвання і супрацьдзеяння такому тыпу атак, і калі не будзе праведзена яе маштабнае перапраектаванне, нічога не зменіцца», – сказаў Уітынгтан.

Ён падкрэсліў, што міжнародныя санкцыі абмежавалі магчымасці Масквы атрымліваць тэхналогіі, неабходныя для стварэння новых сістэм, здольных супрацьстаяць такім атакам.

«Нават калі ўдасца павялічыць вытворчасць, вы проста павялічыце выпуск ракетных сістэм, якія ўсё адно не будуць выконваць сваю працу», – дадаў ён.

Чаму дроны ўсё часцей прарываюцца

Праўда, эксперты адзначаюць, што расійская СПА, верагодна, па-ранейшаму збівае значную частку ўкраінскіх беспілотнікаў. Раніцай у пятніцу расійскія вайскоўцы заявілі, што збілі 216 украінскіх дронаў па ўсёй краіне.

Камандуючы Сіламі беспілотных сістэм Украіны Роберт Броўдзі у сваім аналізе сістэмы супрацьпаветранай абароны Масквы заявіў, што станам на сярэдзіну мая ў расійскай сталіцы ўсё яшчэ налічвалася больш за 100 пускавых установак СПА і больш за 50 мабільных сістэм супрацьпаветранай абароны «Панцыр».

Але калі Украіна запускае больш за 100 беспілотнікаў падчас адной атакі, частка з іх, верагодна, усё роўна прарываецца праз абарону, нават калі яна добра ўмацаваная, падкрэсліла выданне. На думку Уітынгтана, сучасныя беспілотнікі таксама могуць пранікаць праз сістэму абароны, бо іх складаней адсочваць, чым большыя ракеты або самалёты.

«Яны могуць з’явіцца на радары, але існуе велізарная розніца паміж выяўленнем чагосьці на радары і атрыманнем таго, што мы называем «якасным суправаджэннем мэты», – патлумачыў ён.

«Усе варыянты для Расіі дрэнныя»

Паводле яго слоў, сотні беспілотнікаў, што наступаюць з розных напрамкаў, патрабуюць велізарнай каардынацыі з боку інтэграванай сістэмы СПА Расіі, але «гэта належным чынам не адбываецца».

Паўторныя маштабныя далёкабойныя атакі Украіны прывялі да здагадкаў, што Расія таксама можа вычэрпваць запасы баяпрыпасаў для СПА. Эксперты папярэджваюць, што цяжка ацаніць стан расійскіх запасаў абарончых ракет, бо гэтая інфармацыя не абнародуецца. Але запасы непазбежна будуць скарачацца, калі ўкраінскія ўдары і далей будуць маштабнымі і частымі.

«Што да частаты і сур’ёзнасці атак Украіны супраць Расіі, то для Расіі ўсе варыянты дрэнныя. Думаю, цяпер ваенныя, верагодна, разважаюць над тым, які варыянт з’яўляецца найменш дрэнным у спробе супрацьстаяць таму, з чым яны сутыкаюцца з боку Украіны», – дадаў Уітынгтан.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]