«Роскосмос» зноў адклаў палёт на Месяц

Першапачатковыя тэрміны кардынальна зрушыліся.

Запуск бліжэйшай місіі на Месяц перанесены з 2027 на 2028 год, паведаміў віцэ-прэзідэнт Расійскай акадэміі навук (РАН) Сяргей Чарнышоў на пасяджэнні прэзідыума. Ідзе гаворка пра апарат «Луна-26». Наступныя некалькі місій таксама адкладзены. Апараты «Луна-27/1» і «Луна-27/2» запусцяць у 2029 і 2030 гадах, а «Луну-28» — у 2036-м, перадае The Moscow Times.

Першапачатковыя тэрміны кардынальна зрушыліся. «Роскосмос» разлічваў адправіць «Луну-26» у 2023 годзе, а «Луну-27» — у 2024-м. Наступную місію, мэтай якой заяўленая дастаўка на Зямлю узораў месяцовага грунту, запланавалі на 2030 год. Аднак пазней «Луну-28» перанеслі на 2034-ы, а цяпер зноў адклалі.

Адзіны запуск адбыўся ў 2023 годзе, хоць да гэтага яго адкладалі дзевяць разоў. Гэта была першая за паўстагоддзя расійская касмічная місія на Месяц, але яна пацярпела фіяска. Станцыя «Луна-25», якую рыхтавалі больш за 10 гадоў, разбілася аб паверхню спадарожніка Зямлі. Тадышні кіраўнік «Роскосмоса» Юрый Барысаў назваў гэты досвед «бясцэнным» і спісаў няўдачу на 50-гадовы перапынак у даследчай праграме.

Нягледзячы на правал апошняй місіі, пастаянныя пераносы запускаў і зацягнутую вайну ва Украіне, якая прывяла да разрыву супрацоўніцтва з Еўрапейскім касмічным агентствам, Расія працягвае будаваць глабальныя планы па асваенні Месяца і нават задумалася аб стварэнні там сваіх «суверэнных тэрыторый».

Паводле слоў Чарнышова, праграма даследавання Месяца падзелена на два этапы: спачатку — адпрацоўка тэхналогій, неабходных для пасадкі і даследаванняў на паверхні, а потым — стварэнне «элементаў месяцовых баз». Галоўная задача найбліжэйшай місіі — выбраць прыдатныя пляцоўкі для прылунення. Пасля, у 2029 і 2030 гадах, на Паўднёвы і Паўночны полюсы Месяца будуць накіраваныя пасадачныя модулі («Луна-27»). Пасля гэтага ў 2032 годзе плануецца запусціць арбітальную станцыю «Луна-29», а ў 2034-м да спадарожніка адправіцца «Луна-30» з цяжкім лунаеходам для працяглых даследаванняў. Аб’ём фінансавання нацыянальнага праекта «Космас» складзе 4,4 трлн рублёў да 2036 года.

Пры гэтым Расія ўжо саступіла ў месяцовай гонцы Кітаю і Індыі — краінам, якія раней лічыліся яе «малодшымі» партнёрамі. «Мы разучыліся садзіцца на Месяц, — скрушліва казаў у 2021 годзе акадэмік Міхаіл Мароў, які браў удзел у некалькіх савецкіх міжпланетных місіях, у тым ліку па дастаўцы месяцовага грунту на Зямлю. — У 70-я гады мы рабілі гэта неаднаразова, а цяпер мы страцілі ўсё тое, што забяспечвала нашы дасягненні».

Гісторык касманаўтыкі Аляксандр Жалязнякоў прыводзіў падобную ацэнку. «За 47 гадоў, што мінулі з моманту запуску папярэдняй (месяцовай) станцыі, шмат што змянілася. І навука пайшла наперад, і тэхніка пайшла наперад, мы, на жаль, за гэтыя гады крыху страцілі свае кампетэнцыі», — каментаваў ён правал месяцовай місіі ў 2023 годзе. Жалязнякоў заклікаў прыструніць амбіцыі і зразумець, што ўсяму давядзецца вучыцца нанова.

Вы можаце падтрымаць сайт Charter97.org наступным чынам:

РАЗЛІКОВЫ МУЛЬТЫВАЛЮТНЫ РАХУНАК ДЛЯ АХВЯРАВАННЯЎ:

Назва банка: Bank Millennium S.A.
Адрас: ul. Stanislawa Zaryna, 2A, 02-593, Warszawa
IBAN: PL97116022020000000216711123
SWIFT: BIGBPLPW
Імя ўладальніка рахунку: Fundacja “KARTA ‘97”
рызначэнне аплаты: Darowizna na cele statutowe

Звязацца з намі можна праз адрас [email protected]