Ананіч: Міністэрствам вядзецца дзейнасць для абмежавання шэрагу інтэрнэт-рэсурсаў

У Беларусі створаная «прававая база для кантролю за распаўсюджванай СМІ інфармацыяй».

Аб гэтым паведаміла сёння на калегіі Міністэрства інфармацыі Беларусі кіраўніца міністэрства Лілія Ананіч, паведамляе БелТА.

З уваходам у дзеянне з 1 студзеня 2015 года ў Беларусі закона аб СМІ створаная дзейсная прававая база, якая дазваляе прыцягваць да адказнасці інтэрнэт-СМІ за распаўсюджванне неналежнай інфармацыі.

Ужо сёння міністэрствам вядзецца дзейнасць для абмежавання шэрагу інтэрнэт-рэсурсаў. І часта інфармацыя паступае ад грамадзян, якія звяртаюцца ў інфармацыйнае міністэрства, запэўнівае міністарка інфармацыі.

Са слоў Ліліі Ананіч, сёння «вельмі важна ўсім сродкам масавай інфармацыі працаваць над падачай у інтэрнэт-асяроддзі». Яна звярнула ўвагу, што большасць друкаваных сродкаў масавай інфармацыі сёння маюць свае сайты, якія актыўна абнаўляюцца. Акрамя таго, ствараюць старонкі ў сацыяльных сетках.

Нагадаем, што з 19 снежня 2014 года без тлумачэння прычын сайт charter97.org ды шэраг іншых незалежных інтэрнэт-рэсурсаў былі заблакаваныя для ўсіх інтэрнэт-карыстальнікаў Беларусі.

Наша служба тэхпадтрымкі здолела змінімізаваць блакаванне, аднак шмат якія карыстальнікі з Беларусі далей паведамляюць пра цяжкасці з доступам да сайта.

Інструкцыя абыходу блакавання - тут.

Фота БелаПАН