Заўтра - суд аб падаўжэнні нагляду над Змітром Дашкевічам

Суд Першамайскага раёна разгледзіць магчымасць спынення прэвентыўнага нагляду над сустаршынёй «Маладога фронту».

Пра гэта былому палітвязню паведаміў інспектар міліцыі Першамайскага раёна Менска.

«Заўтра будзе суд па прэвентыўным наглядзе, і інспектар сказаў, што падрыхтаваныя дакументы на яго спыненне», - распавёў Дашкевіч сайту charter97.org.

Тэрмін дзеяння нагляду заканчваўся апоўначы 27 траўня, але 29 траўня міліцыя прыйшла да актывіста з візітам.

«Да мяне прыходзілі міліцыянты, я быў у гэты час на працы. І яны сказалі, што ў іх ёсць інфармацыя, што наглядам падоўжаць. Што ў іх такое адбываецца і чаму ўсё так хутка мяняецца, сказаць складана. Можа, спачатку ў іх была ўстаноўка нагляд падоўжыць, а потым яны там вырашылі, што лепш нам ад гэтага «неадэквата» пазбавіцца», - жартуе ён.

28 жніўня 2013 года палітвязень Зміцер Дашкевіч выйшаў на волю з гродзенскай турмы №1 пасля амаль трохгадовага зняволення за нібыта «асабліва злоснае хуліганства». Прэвентыўны нагляд за ім быў замацаваны на 6 месяцаў, пасля чаго тэрмін падоўжылі яшчэ на тры.

Увесь гэты час Дашкевіч абавязкова павінен быў знаходзіцца па месцы жыхарства ў перыяд з 20 вечара да 6-й раніцы. У любы дзень ці ноч да яго маглі прыйсці з праверкай.

Нагадаем, нядаўна палітык правёў 25 сутак на Акрэсціна. Ён быў адным з актывістаў, кінутых за краты на час ЧС па хакеі ў Менску.