Сяргей Чалы: 30% падатак значна горш, чым дэвальвацыя

Пастанова ўвесці 30% падатак на куплю валюты выкліча з'яўленне чорнага рынку і шэрых схем канвертацыі валюты.

Пра гэта заявіў эканаміст Сяргей Чалы, каментуючы "Беларускаму партызану" навіну аб увядзенні 30% падатку на куплю валюты.

"Улады паўтараюць памылкі сакавіка 2011 года, - заявіў ён. - Гэтай пастановай яны павялічваюць розніцу паміж набыццём і продажам на 30%. Калі купляць даляры яны будуць за 11 000, то прадаваць фактычна за 15 000".

Са слоў Чалага, гэта не зусім дэвальвацыя.

"Гэта пастанова дазваляе зрабіць ім нявінны выраз твару і сказаць, што тое дэвальвацыі няма, але на самой справе тое, што адбылося значна горш, чым дэвальвацыя. Фактычна яны проста забіваюць рынак. Сапраўды гэтак жа, як яны забівалі яго ў сакавіку 2011 года", - мяркуе Чалы.

"Гэта значыць афіцыйны курс будзе, але ўгоды па ім праводзіцца не будуць. А, значыць, зноў з'явіцца "чорны" рынак, сайт "Пракаповіч", прадпрыемствы не будуць вяртаць валютную выручку і г.д. Мы гэта ўжо праходзілі. Усякія адміністрацыйныя бар'еры абыходзяцца. Але ўлады, падобна, зноў спрабуюць супраціўляцца непазбежнаму. Чым даўжэй яны будуць спрабаваць супраціўляцца непазбежнаму - тым горш будзе для ўсіх", - перакананы Чалы.

Нагадаем, што 19 снежня Нацбанк Беларусі абвясціў аб увядзенні 30% падатку на набыццё валюты. Акрамя таго, забароненая выдача рублёвых крэдытаў і ўведзеныя іншыя абмежаванні.