«Савет рэспублікі» ўхваліў закон аб блакаванні непажаданых сайтаў

«Савет рэспублікі «18 снежня ўхваліў праект закона «Аб унясенні дапаўненняў і змяненняў у Закон Рэспублікі Беларусь «Аб сродках масавай інфармацыі».

Прэзентавала законапраект міністр інфармацыі Лілія Ананіч. Учора ён быў прыняты «палатай прадстаўнікоў», нагадвае БелаПАН.

«Гэта неабходна для таго, каб інтэрнэт-рэсурсы, якія фактычна з'яўляюцца паўнапраўнымі ўдзельнікамі інфармацыйнага поля, паўнапраўнымі сродкамі масавай інфармацыі, прычым найбольш глабальнымі, неслі адказнасць за кантэнт», - сказала міністр інфармацыі Лілія Ананіч. Уладальнік рэсурсу будзе абавязаны выдаляць супрацьпраўны кантэнт пасля вынясення яму адпаведнага папярэджання.

«Прапанаваныя змены кажуць аб тым, што будзе надзейны заслон тых рэсурсаў, якія публікуюць супрацьпраўную інфармацыю», - канстатавала Ананіч.

З яе слоў, у Міністэрства інфармацыі з'яўляецца права абмяжоўваць доступ да рэсурсаў, якія нясуць у сабе пагрозу нацыянальнай бяспецы, інфармацыя якіх супярэчыць нацыянальным інтарэсам.

Ананіч паведаміла, што ўводзіцца рэестр распаўсюджвальнікаў друкаванай інфармацыі, электронных СМІ. Упершыню ўводзіцца абавязковая гарантыя для распаўсюджвання агульнадаступнага тэлепакету аператарамі электрасувязі.

Як сцвярджаюць распрацоўшчыкі, гэты дакумент накіраваны на ўдасканаленне норм закона ад 17 ліпеня 2008 года «Аб сродках масавай інфармацыі» з улікам практыкі іх прымянення ў мэтах абароны дзяржаўных і грамадскіх інтарэсаў у галіне масавай інфармацыі, нацыянальнай бяспецы Беларусі ў інфармацыйнай сферы, а таксама гарманізацыі з заканадаўствам дзяржаў - удзельніц Дагавора аб стварэнні Еўразійскага эканамічнага саюзу.

Больш дэталізаванымі становяцца заканадаўчыя палажэнні аб дзейнасці, рэгістрацыі і перарэгістрацыі сродкаў масавай інфармацыі, распаўсюдзе прадукцыі сродкаў масавай інфармацыі, пра зняпраўджванне фізічнымі асобамі звестак, распаўсюджаных сродкамі масавай інфармацыі, што не адпавядаюць рэчаіснасці, якія ганяць іх гонар, годнасць ці дзелавую рэпутацыю, аб адказнасці за парушэнне заканадаўства аб сродках масавай інфармацыі.

Як паведаміла журналістам Ананіч, «галоўнай навацыяй законапраекта з'яўляецца распаўсюджванне дзеяння закона на інтэрнэт-рэсурсы, з дапамогай якіх распаўсюджваецца прадукцыя сродкаў масавай інфармацыі». Прычым дзеянне закона распаўсюджваецца на ўсе нормы, акрамя рэгістрацыі інтэрнэт-рэсурсаў.