СК і КДБ расследуюць крымінальныя справы ва Упраўленні справамі Лукашэнкі

Следчы камітэт і КДБ расследуюць шэраг крымінальных спраў, якія тычацца фактаў карупцыі ва Упраўленні справамі дыктатара.

Пра гэта паведаміў кіраўнік справамі Лукашэнкі Віктар Шэйман на нарадзе ў кіраўніка па пытаннях работы гэтай дзяржаўнай структуры.

«Па словах Шэймана, у дадзены момант падраздзяленні Следчага камітэта расследуюць тры крымінальныя справы аб дачыненні шэрагу службовых асоб Галоўнага ўпраўлення капітальнага будаўніцтва, Галоўнага гаспадарчага ўпраўлення (ГГУ) да здзяйснення злачынстваў па крадзяжу бюджэтных сродкаў», - паведамілі агенцтву «Інтэрфакс-Захад» у пятніцу ў прэс-службе кіраўніка.

Там адзначылі, што ў дачыненні да шэрагу службовых асобаў праводзіцца праверка Камітэта дзяржаўнай бяспекі па падазрэнні ў карупцыйных злачынствах.

«Шэйман звярнуў увагу на сур'ёзныя парушэнні ў частцы эфектыўнасці расходавання грашовых сродкаў пры ажыццяўленні закупак для дзяржаўных патрэб у будаўніцтве і іншых сферах», - падкрэслілі ў прэс-службе. «Гэта выявілі праверкі з боку кантралюючых, праваахоўных органаў, а таксама вывучэнне сітуацыі на шэрагу прадпрыемстваў УС міжведамаснымі рабочымі групамі. Незаконным дзеянняў асобных службовых асобаў ужо дадзена прававая ацэнка, у дачыненні да некаторых узбуджаныя крымінальныя справы», - сказаў Шэйман. Паводле яго слоў, «па дадзеных КДК, 15 арганізацый Упраўлення справамі ў 2009-2012 гадах ажыццяўлялі фінансавую дзейнасць з суб'ектамі гаспадарання, якія мелі прыкметы ілжэпрадпрымальніцтва».

На думку Кіраўніка справамі, «галоўнай прычынай назапашаных праблем з'яўляецца слабая эфектыўнасць сістэмы кіравання, а ў шэрагу выпадкаў - нізкі прафесіяналізм кадраў і няздольнасць вырашаць складаныя задачы. Кіроўчы апарат пакутуе адсутнасцю гнуткасці, аператыўнасці, дзейснага кантролю», - праінфармавалі ў прэс-службе.

Звяртаючыся да супрацоўнікаў Упраўлення справамі, Лукашэнка падкрэсліў: «Вы, напэўна, думалі, што ўсё гэта так з рук сыдзе. А я вас папярэджваў: не глядзіце на тое, хто побач са мною ходзіць, кожны адказвае за канкрэтную справу. Усе вы маеце свае паўнамоцтвы і зону адказнасці. І крымінальную справу, якая заведзеная, трэба актывізаваць, і прытым прайсці шырокім фронтам, не гледзячы ні на набліжаных, ні на выдаленых», - паведамілі ў прэс-службе.

«Сканчаючы размову пра факты магчымай карупцыі, майце на ўвазе, што я дарма нічога не кажу. Калі я кажу, што некаторыя нашы начальнікі прыродаахоўных зон, запаведнікаў, лясоў і гэтак далей пачынаюць абрастаць роднаснымі сувязямі і дзе-нідзе хтосьці там свае ўгоддзі мае, пад дахам дзяржавы іх здае, то вось загрыміце адразу!», - папярэдзіў кіраўнік. «Толькі адзін радок або заўвага, і вы будзеце размаўляць са следчым. Гэта я вам гарантую», - сказаў Лукашэнка.

«Таму ў вас яшчэ ёсць невялікі прамежак часу, пакуль да вас не прыйшлі, неадкладна кампенсаваць усе, што, не дай Бог, вы выпадкова паклалі ў сваю кішэню ці далі сваім сваякам. Я вас катэгарычна папярэджваю! Лепш у два разы больш заплаціце, свабода даражэй», - рэзюмаваў ён.