МЗС нападае на ЗША за санкцыі

Афіцыйны Менск абвінаваціў ЗША ў парушэнні імі міжнародных абавязацельстваў.

Аб гэтым Андрэй Савіных сказаў у праграме «Контуры» на тэлеканале ОНТ. Паводле яго слоў, згодна з падпісаным у 1994 годзе ў Будапешце мемарандумам аб гарантыях бяспекі ў сувязі з далучэннем Беларусі да Дамовы аб нераспаўсюджанні ядзернай зброі, ЗША добраахвотна ўзялі на сябе юрыдычна абавязваючыя іх дамоўленасці.

«А менавіта яны абавязаліся не ўжываць ні пры якіх абставінах меры эканамічнага прымусу ў дачыненні да Беларусі», - адзначыў Андрэй Савіных, піша «Тэлеграф».

Аднак ЗША свае абавязацельствы парушылі, фактычна не выканаўшы юрыдычна абавязваючаю дамоўленасць, лічыць ён.

На думку Андрэя Савіных, гэта сур'ёзнае парушэнне, якое «падрывае аўтарытэт саміх ЗША».

Прэс-сакратар МЗС адзначыў, што ў тых сферах, дзе бакі адыходзяць ад палітычных клішэ, «дыялог выбудоўваецца досыць роўна» і прывёў у прыклад сумесны кантроль над нераспаўсюджваннем ядзернай зброі.

Сёння беларусы цалкам канструктыўна супрацоўнічаюць з амерыканцамі па кантролі, звязаным з перамяшчэннем ядзерных матэрыялаў праз мяжу Беларусі, сказаў Андрэй Савіных. «Яны бачаць тут ролю Беларусі, у нас сур'ёзны транзітны патэнцыял. Гэта супрацоўніцтва ў інтарэсах і нашай краіны, і ЗША, і ўсяго свету ў цэлым. Тут мы лёгка знаходзім пункты сутыкнення», - падкрэсліў ён.

Прэс-сакратар беларускага МЗС лічыць, што гэтыя прынцыпы павінны рэалізоўвацца і ў іншых сферах.

Андрэй Савіных сказаў, што, нягледзячы на санкцыі ЗША ў дачыненні да Беларусі, тавараабарот за мінулы год складзе каля 700 млн даляраў. З ЗША Беларусь імпартуе складанае тэхнічнае абсталяванне для пераўзбраення сваіх прадпрыемстваў.

«Сальда ў гандлі ў інтарэсах ЗША, мы імпартуем значна больш, чым экспартуем на амерыканскі рынак», - сказаў прэс-сакратар МЗС.

Паводле яго слоў, беларускі экспарт у ЗША часткова абмежаваны з-за санкцый, а ў Беларусі ёсць што прапанаваць амерыканцам. Ён адзначыў, што актыўна развіваецца экспарт інфармацыйных паслуг і рост склаў больш за 60% у год. «Таксама мы маглі б больш сур'ёзна развівацца і ў іншых сферах», - мяркуе прэс-сакратар МЗС.

Нагадаем, у 2012 годзе ў ЗША быў прыняты новы пакет санкцый супраць беларускіх чыноўнікаў і прадстаўнікоў сілавых структур, на якіх накладваюцца візавыя абмежаванні і фінансавыя санкцыі. Таксама санкцыі распаўсюджваюцца на шэраг прадпрыемстваў.

Санкцыі не будуць знятыя з Беларусі да таго часу, пакуль на свабоду не выйдуць усе палітвязні.