Сікорскі: Еўразвяз будзе клапаціцца аб 10 мільёнах еўрапейцаў з Беларусі

«Дыялог аб мадэрнізацыі» павінен быць адрасаваны як беларускаму грамадству, так і ўладам.

Пра гэта заявіў міністр замежных спраў Польшчы Радаслаў Сікорскі, выступаючы 27 жніўня ў Таліне перад удзельнікамі семінара па пытаннях парламентарызму і дэмакратызацыі для прадстаўнікоў беларускай грамадзянскай супольнасці, перадае БелаПАН.

Па словах кіраўніка польскай дыпламатыі, Еўразвяз будзе «клапаціцца аб дзесяці мільёнах еўрапейцаў, якія жывуць у Беларусі». Разам з тым Сікорскі выказаў надзею на тое, што сама беларуская грамадзянская супольнасць зможа зрабіць больш для ўкаранення ідэй Усходняга партнёрства і «Еўрапейскага дыялогу аб мадэрнізацыі з Беларуссю» у свядомасць жыхароў краіны.

Сікорскі адзначыў важную ролю Форуму грамадзянскай супольнасці праграмы ЕЗ «Усходняе партнёрства» для развіцця кантактаў паміж дэмакратычнай Еўропай і ўсходнімі суседзямі Еўразвяза.

Па словах Сікорскага, ужо зарэгістраваны створаны пад эгідай ЕЗ Фонд падтрымкі дэмакратыі (European Endowment for Democracy), які можа стаць, у прыватнасці, інструментам аператыўнай падтрымкі беларускіх арганізацый трэцяга сектара. Ён будзе фінансавацца сумесна краінамі ЕЗ і Еўракамісіяй.

Польшча, адзначыў міністр, ужо зрабіла першы ўнёсак у 5 мільёнаў еўра. А паколькі Брусель мае намер фінансаваць фонд на роўных з краінамі-удзельнікамі, то 10 мільёнаў еўра ў распараджэнні фонду ўжо ёсць.

Таксама, па словах польскага міністра, неўзабаве ў Польшчы адкрыецца ВНУ, у якім змогуць атрымаць дыпламатычную адукацыю і прадстаўнікі краін Усходняга партнёрства