Шведскі «дэсант» мог жыць каля адміністрацыі Лукашэнкі

Прайшло 10 сутак, а КДБ так і не адпусціў рыэлтэра, які здаў шведскім пілотам кватэру ў Менску.

Як раней паведамляў сайт charter97.org, Сяргей Башарымаў з 7 ліпеня знаходзіцца ў СІЗА КДБ па падазрэнні ў дапамаганні незаконнаму перасячэнню дзяржаўнай мяжы. Правініўся рыэлтар у тым, што менавіта ён здаў кватэру ў Менску шведам, якія з зямлі падстрахоўвалі пілотаў шведскага самалёта.

«Еўрарадыё» знайшло агенцтва, дзе працуе Сяргей Башарымаў. Там асцярожна кажуць, што Сяргей «нечакана з'ехаў у адпачынак» і нават яго мама не ведае, дзе ён і калі вернецца.

«Тыдзень, напэўна. Магчыма, дзён 10 адпачывае ўжо. Спантана так неяк атрымалася, сувязі няма з ім. І мама яго не ведае нічога. Не ведае, калі Сяргей вернецца», - паведамілі ў агенцтве.

Далейшыя пошукі інфармацыі аб «спантанна з’ехаўшым у адпачынак» Башарымаве прыводзяць да яго былога напарніка. Ён згаджаецца распавесці падрабязнасці знікнення калегі. Праўда, сам ведае не шмат. Нават аб «мядзведжым дэсанце» даведаецца ад журналіста.

Сяргей Башарымаў знік 7 ліпеня, праз 3 дні пасля нелегальнага візіту шведскага самалёта ў Беларусь. Увечары яго маме патэлефанавалі з КДБ і распавялі, што сын падазраецца ў дапамаганні перасячэнню мяжы групай асоб. У тым жа, у чым і журналіст Антон Сурапін.

Башарымаў у пачатку ліпеня здаваў кватэру грамадзянам Швецыі. Верагодна, менавіта тым, якія суправаджалі акцыю з дэсантаваннем мішак. І не проста здаваў, а зарэгістраваў іх у сябе ... дома. Гэта неабходная працэдура для ўсіх замежных грамадзян, якія наведваюць Беларусь. Так што знайсці Башарымава чэкістам не склала цяжкасці.

Рыэлтар здаваў кватэры па многіх сталічных адрасах. Сярод іх ёсць жыллё па вуліцы Мельнікайтэ, на праспекце Незалежнасці і нават па адрасе ... Карла Маркса, 45. Гэта зусім побач з Адміністрацыяй прэзідэнта. А менавіта туды, па першапачатковым плане шведаў, збіраўся ляцець шведскі самалёт. На жаль, у агенцтве не ведаюць, якая з гэтых кватэр здавалася.

10-дзённы тэрмін зняволення Башарымава пад варту скончыўся 17 ліпеня. Аднак раніцай 18-га яго тэлефон па-ранейшаму адключаны, калегі кажуць, што «адпачынак працягваецца».

Юрыст Гары Паганяйла адзначае, што беларускае заканадаўства дазваляе затрымліваць людзей і больш чым на 10 дзён.

«Могуць у якасці прафілактычнага затрымання. Гэта калі чалавек падазраецца ў тэрарызме або іншых асабліва цяжкіх злачынствах. Тут могуць і 30 дзён трымаць».

Аднак па падазрэнні ў дапамаганні перасячэнню мяжы групай асоб утрыманне пад вартай больш чым на 10 дзён не прадугледжана. Праўда, у следчых ёсць спосаб абыйсці гэта абмежаванне. Хлопцы, якія праходзілі па нашумелай справе «аб анархістах», сядзелі без прад'яўлення абвінавачванняў і па два месяцы.

«Па справах аб падпале, так званым хуліганскім дзеянні анархістаў, людзей як быццам перазатрымлівалі. Затрымлівалі па падазрэнні ў адным злачынстве, а затым, калі тэрмін зняволення пад варту сканчаўся, аўтаматычна выносілі новую пастанову і затрымлівалі па новых падазрэннях. І так некалькі разоў. Нават па 7-8».