Мясніковіч: План па інвестыцыях правалены

Беларусь не выканае ў 2012 годзе прагноз па прыцягненні інвестыцый ад прыватызацыі.

Пра гэта паведаміў сёння прэм'ер-міністр Беларусі Міхаіл Мясніковіч, адказваючы на пытанні журналістаў, перадае БелТА.

«Мы не выканаем прагноз бягучага года па прыцягненні $2,5 млрд. ад прыватызацыі, - сказаў ён. - Але я б не рабіў з гэтага трагедыю. Мы маем іншыя механізмы падтрымання дастатковага ўзроўню золатавалютных рэзерваў».

А што тычыцца прыватызацыі, то гэта не значыць, што Беларусь імкнецца атрымаць грошы ад створанай усім народам маёмасці. «Мы прыватызацыю разглядаем як дыверсіфікацыю вытворчасці, як прыход новых тэхналогій, як інтэграцыю ў транснацыянальныя карпарацыі, - сказаў прэм'ер-міністр. - Важна, каб на знешнім рынку транснацыянальныя карпарацыі сталі не толькі нашымі канкурэнтамі, але і партнёрамі. Таму мы разглядаем прыватызацыю як інтэграцыйны механізм, а не механізм зарабляння грошай для таго, каб пакрыць нейкія імгненныя рэчы». Таму Беларусь ніколі не разлічвала і не будзе разлічваць на тое, каб напаўняць бюджэт або золатавалютныя рэзервы толькі за кошт прыватызацыі. «Мы зрабілі прафіцытны бюджэт, не дабраліся сродкаў ад прыватызацыі, але ў нас ёсць іншыя магчымасці, у тым ліку і па напаўненні ЗВР», - яшчэ раз падкрэсліў кіраўнік урада.

Пры гэтым ён адзначыў, што калі ўдзел інвестараў на беларускім рынку патрабуе прыватызацыі, то Беларусь гэта разглядае як інтэграцыю ў сусветнагаспадарчыя эканамічныя сувязі. Гэта значыць, гаворка не ідзе пра тое, каб нешта прадаць, а арганізаваць зладжаную працу з інвестарам, дзякуючы чаму будзе забяспечвацца развіццё прадпрыемстваў.