Павел Севярынец: У Беларусі з'явіўся яшчэ адзін палітвязень

Сустаршыня аргкамітэта па стварэнні Партыі «Беларуская хрысціянская дэмакратыя», патрабуе вызвалення Андрэя Гайдукова.

Таксама палітык настойвае на растлумачэнні аперацыі па яго затрыманню, паведамляе bchd.info.

«Уся гэтая гісторыя з заключэннем Андрэя Гайдукова стварае ўражанне абсурду, прычым жорсткага і гвалтоўнага абсурду, накіраванага на запалохванне грамадства. 22-гадовы слесар, намеснік старшыні грамадскага аб'яднання «Саюз маладых інтэлектуалаў», прыхільнік Хрысціянскай Дэмакратыі, актывіст сацыяльных сетак раптам, аказваецца, «закладвае тайнік». Што ж вы, прафесіяналы, не дачакаліся там, каля «тайніка» якога-небудзь заакіянскага Джэймса Бонда, якому так патрэбна «сацыяльна-эканамічная інфармацыя аб Рэспубліцы Беларусь»? Можа быць, таму, што ніякага шпіёна і шпіянажу там няма? Крывавыя гісторыі пра японскіх і румынскіх «шпіёнаў» наша краіна ўжо праходзіла ў 1937 годзе. Можа, камусьці трэба паказаць, што КДБ працуе і дзеля гэтага хапаюць першага ж актывіста, нязгоднага з рэжымам, які трапіўся пад руку. Ніхто ж не верыць гэтым «афіцыйным версіям», - сказаў Павел Севярынец.

Палітык запатрабаваў тлумачэння прычын затрымання Гайдукова.

«Калі ніякіх ясных тлумачэнняў віны Гайдукова прадстаўлена не будзе - можна лічыць, што ў Беларусі з'явіўся 15-ты палітвязень», - адзначыў ён.

Нагадаем, 8 лістапада быў арыштаваны актывіст аргкамітэта па стварэнні партыі «Беларуская Хрысціянская Дэмакратыя» Андрэй Гайдукоў. Цяпер ён знаходзіцца ў «амэрыканцы», КДБ абвінаваціў яго ў працы на замежную выведку.

Па заяве КДБ, актывіста затрымалі нібыта ў момант закладкі тайніка са звесткамі, якія цікавяць замежныя спецслужбы. На яго заведзеная крымінальная справа па артыкуле 356 Крымінальнага Кодэксу «здрада дзяржаве ў форме правядзення агентурнай дзейнасці».