Кіраўнік ПАРЕ: Існуюць сур'ёзныя сумневы ў вінаватасці «менскіх тэрарыстаў»

ПАРЕ выступае супраць смяротнага пакарання як такога пры любых абставінах, не тое, што пры такіх сумніўных.

Існуюць «сур'ёзныя сумневы» у вінаватасці Дзмітрыя Канавалава і Уладзіслава Кавалёва, прысуджаных да вышэйшай меры пакарання за здзяйсненне тэракту ў менскім метро ў красавіку 2011 года.

Аб гэтым сёння заявіў нядаўна абраны старшыня Парламенцкай асамблеі Рады Еўропы Жан-Клод Міньён. Еўрапейскі палітык накіраваў беларускім уладам афіцыйна ліст з просьбай захаваць ім жыццё.

«Асамблея выступае супраць смяротнага пакарання як такога пры любых абставінах, - нагадаў Міньён. - Разам з тым у выпадку з Канавалавым і Кавалёвым, у мяне ёсць сур'ёзныя сумневы ў вінаватасці гэтых двух маладых людзей у здзяйсненні жахлівага тэракту ў менскім метро».

«Існуюць відавочныя прыкметы таго, што прызнанні, на падставе якіх Канавалаў і Кавалёў былі асуджаныя, былі атрыманы пад катаваннямі», - лічыць вядомы французскі дэпутат. На ягоную думку, у справе таксама адсутнічаюць «якія-небудзь сур'ёзныя доказы». Такім чынам, працягнуў Міньён, «пакаранне гэтых маладых людзей будзе асабліва абуральным парушэннем прынцыпаў справядлівасці і правоў чалавека».

Вярхоўны суд Беларусі прысудзіў Дзмітрыя Канавалава і Уладзіслава Кавалёва да выключнай меры пакарання - расстрэлу. На думку беларускіх кампетэнтных органаў менавіта яны здзейснілі тэракт у менскім метро, ​​у выніку якога загінулі 15 і атрымалі раненні больш за 300 чалавек.