Брэсцкія дэмакраты будуць байкатаваць «выбары»

Брэсцкая Дэмакратычная Кааліцыя (БДК) «Спадчына» прыняла рашэнне аб поўным байкоце так званых «парламенцкіх выбараў», якія плануюцца рэжымам на 2012 год.

Сваё рашэнне кааліцыя засноўвае на наступных фактах:

- Выбары прэзідэнта 19 снежня 2010 года пераважнай большасцю беларускага народа і сусветнай супольнасцю не прызнаныя, таму ў краіне няма легітымнай улады.

- Заканадаўчую, выканаўчую і судовую ўладу ў Беларусі ажыццяўляе адзін чалавек - Лукашэнка А.Р., у сувязі з чым «парламент» не з'яўляецца прадстаўнічым і заканадаўчым органам Рэспублікі Беларусь, ягонае існаванне носіць фіктыўны характар.

- У турмах сілком утрымліваюцца палітвязні, іхняму жыццю пагражае небяспека.

- Не рэгіструюцца палітычныя партыі і арганізацыі (БХД, «Вясна» і інш);

- Няма доступу да СМІ тым партыям і арганізацыям, якія прадстаўляюць альтэрнатыўныя пункты гледжання.

- Цяперашняе выбарчае заканадаўства не забяспечвае свабоду, адкрытасць і галоснасць выбараў.

- Зыходзячы з гэтага, канстатуем, што пры існуючым рэжыме дэмакратычныя выбары ў Беларусі немагчымыя.

Лічым удзел асобных лідэраў і сябраў палітычных партый і рухаў у гэтым фарсе правакацыяй. У цяперашняй сітуацыі гэта выглядае амаральна і блюзнерска.

Мы заклікаем грамадзян Беларусі не прымаць удзелу ў чарговым спектаклі пад назвай «парламенцкія выбары», а разам з намі далучыцца да іх актыўнага байкоту.

Пагадненне падпісалі:

Шурхай Зміцер, «Беларуская хрысціянская дэмакратыя»

Чаркашын Аляксандр, «Беларуская хрысціянская дэмакратыя»

Ваўранюк Васіль, БСДП (Народная Грамада)

Станіслаў Фядзько, БСДП (Народная Грамада)

Чайкоўскі Віктар, РГА «Перспектыва»

Петрусевіч Фёдар, «Еўрапейская Беларусь»

Шарэнда-Панасюк Паліна, «Еўрапейская Беларусь»

Бацук Юрый, «Маладая Беларусь»