Ірына Халіп: Калі б ЕЗ увёў санкцыі - аднаго дня хапіла б, каб усе палітвязні выйшлі

Жонка палітвязня Андрэя Саннікава лічыць, што еўрапейскія палітыкі паводзяцца, на жаль, проста беспрынцыпова.

«Еўрапейскія палітыкі са сваімі заявамі, што «нашая пазіцыя цвёрдая, паслядоўная»... І чаго яны дамагліся? Яны будуць пашыраць нават не спіс неўязных, а спіс крытэраў, па якіх яны гэтых са спісу неўязных праз пару гадкоў будуць вызначаць. Я лічу, што еўрапейскія палітыкі паводзяцца, на жаль, проста беспрынцыпова», - заявіла Ірына Халіп, жонка кандыдата ў прэзідэнты Андрэя Саннікава, піша «Беларускі Партызан».

Так жанчына адказала на пытанне аб надзеі на дапамогу еўрапейскай супольнасці па вызваленні беларускіх палітвязняў.

«Тыя ж кантракты на беларускія нафтапрадукты складаюць усяго толькі паўтара адсоткі ад патрэбаў Еўрапейскага Звяза. Немагчыма адмовіцца ад паўтарох адсоткаў, тым больш - ненадоўга ж. Калі б яны ўвялі гэтыя санкцыі - аднаго дня хапіла б, каб усе палітвязні выйшлі...», - упэўненая Ірына Халіп.