Ежы Бузэк: Еўрапейская палітыка ў дачыненні да Беларусі правалілася

Прэзідэнт Еўрапарламента назваў сваёй галоўнай паразай правал еўрапейскай палітыкі ў дачыненні да Беларусі.

Па паведамленні Польскага радыё, сваю заяву Бузэк зрабіў 15 студзеня ў Варшаве, за дзень да выбараў кіраўніка ЕП, тэрмін паўнамоцтваў якога складае два з паловай гады, перадае БелаПАН.

Па словах кіраўніка Еўрапарламента, нягледзячы на ​​вялікія намаганні, сітуацыя ў Беларусі значна пагоршылася. Становішча ў краіне «нельга трываць», аднак і ўплываць на яго даволі цяжка, канстатаваў Бузэк і заявіў аб неабходнасці падтрымліваць дэмакратычны рух у Беларусі, бо, на ягоную думку, толькі грамадзянская супольнасць можа яго змяніць.

Як адзначыў прэзідэнт ЕП, перад Еўразвязам стаіць дылема: з аднаго боку, неабходна паважаць правы чалавека, з другога, незалежнасць Беларусі ўсё больш ставіцца ў залежнасць ад Расеі з-за пагаршэння эканамічнай сітуацыі, піша БелаПАН.

Бузэк падкрэсліў, што заўсёды намагаўся рэагаваць ў пытанні абароны правоў чалавека ў Еўропе і за яе межамі. «Правы чалавека - галоўны экспартны тавар Еўразвяза», - заявіў ён.